حیدرآباد،02؍اپریل (ایس او نیوز؍ آئی این ایس انڈیا ) تیلگو نیوز چینل کی مشہور اینکر رادھیکا نے خودکشی کرلی۔ بتایا گیا ہے کہ حیدر آباد کے موسا پیٹ علاقہ میں واقع سوشیل اپارٹمنٹ کی پانچویں منزل سے چھلانگ لگا کر رادھیکا نے اتوار کی رات خودکشی کرلی۔اس وقت وہ اپارٹمنٹ میں تنہا تھی۔پولیس کے مطابق چھ ماہ قبل وہ اپنے شوہر سے علیحدہ ہوگئی تھی اور وہ اپنے والد، بھائی اور بہن کے ساتھ رہتی تھی ۔ اینکر کا شوہر اور لڑکا مکان میں موجود نہیں تھے ۔ معلوم ہوا ہے کہ اس کا لڑکا ذہنی طور پر معذور ہے جس کے لئے وہ ہر وقت فکر مند رہتی تھی۔رادھیکا تلگو نیوز چینل وی 6 میں اینکر تھی ۔ پولیس کو اینکر کے پاس سے ایک سوسائیڈ نوٹ دستیاب ہوا جس میں اس نے لکھا کہ اس کا دماغ ہی اس کا دشمن ہے۔