حیدرآباد،11؍نومبر(ایس او نیوز؍یواین آئی) تلنگانہ اسمبلی انتخابات کے پیش نظر یوپی اے کی صدرنشین سونیا گاندھی اس ماہ کی19تاریخ کے بعد ریاست کادورہ کریں گی۔ذرائع کے مطابق وہ دو دن تلنگانہ میں قیام کریں گی۔کانگریس ان کے انتخابی دورہ کے ذریعہ رائے دہندوں پر یہ تاثر چھوڑناچاہتی ہے کہ تلنگانہ کو ریاست کادرجہ سونیا گاندھی نے ہی دیا ہے ۔ریاست میں کانگریس نے حکمران جماعت ٹی آرایس کے خلاف چار جماعتوں کانگریس ، تلگودیشم ،جناسمیتی اور سی پی آئی پر مشتمل ایک عظیم اتحاد تشکیل دیا ہے ۔سمجھاجاتا ہے کہ سونیا گاندھی شمالی اور جنوبی تلنگانہ میں8تا9اسمبلی حلقوں میں کانگریس کیلئے انتخابی مہم چلائیں گی۔حال ہی میں صدر کانگریس راہل گاندھی نے بھی تلنگانہ کا دورہ کیا تھا جہاں انہوں نے تین جلسوں سے خطاب کیا تھا۔ذرائع کے مطابق سونیاگاندھی کے دورہ تلنگانہ کے بعد ایک مرتبہ پھر راہل گاندھی بھی ریاست کادورہ کریں گے جہاں وہ جلسہ عام کے ساتھ ساتھ روڈ شو میں بھی حصہ لیں گے ۔وزیراعلیٰ کے چندرشیکھرراؤ کے حلقہ گجویل میں بھی سونیاگاندھی کے دورہ کی توقع ہے ۔