تیجسوی یادو کا نتیش کمار پر حملہ: ہمارے چچا ڈرے ہوئے ہیں، سرجن گھوٹالے سے بچنے کی کوشش کررہے ہیں
پٹنہ:5 /فروری (ایس اونیوز /آئی این ایس انڈیا) راشٹریہ جنتا دل کے رہنما اور بہار کے سابق نائب وزیر اعلی تیجسوی یادو نے ایک بار پھر بہار کے وزیر اعلی نتیش کمار پر نشانہ لگایا ہے۔تیجسوی نے سرجن اسکینڈل کے ذریعے نتیش کمار پر حملہ بولا ہے۔تیجسوی نے کہا کہ سرجن گھوٹالہ سے خود کو بچانے کے لئے وہ بی جے پی اور سی بی آئی سے ڈر کر پلنگ کے نیچے چھپے ہوئے ہیں۔اس کے ساتھ ہی انہوں نے سی بی آئی کو بھارتیہ جنتا پارٹی کا ساتھی بھی بتایا ہے۔تیجسوی نے کہاکہ نتیش کمار جی سرجن گھوٹالے میں اپنی گردن بچانے کے لئے بی جے پی اور اس کے اتحادی سی بی آئی کے خوف سے چادر اوڑھ کر پلنگ کے نیچے دبکے ہوئے ہیں اور اوپر سے پلنگ کمبل سے ڈھکوا دیا ہے۔ہمارے چچا جی اتنے زیادہ ڈرے ہوئے ہیں کہ اپنی پارٹی میں عہدیدار بھی امت شاہ کی ہری جھنڈی ملنے کے بعد ہی بنا رہے ہیں۔تیجسوی یادو وقت وقت پر نتیش کمار پر ٹویٹر اور تقریروں کے ذریعے نشانے لگاتے رہے ہیں۔حال ہی میں بہار میں بگڑتے قانون ونظام پرحزب اختلاف کے رہنما اور آر جے ڈی لیڈر تیجسوی یادو نے وزیر اعلی کو خط لکھا ہے اور اس پر اقدامات کرنے کی اپیل کی ہے۔بہار میں خراب قانون ونظام کو لے کر تیجسوی یادو نے اپنے خط میں لکھا ہے۔انہوں نے لکھا کہ ایسا لگتا ہے کہ سماج دشمن عناصر کو کھلی چھوٹ دے دی گئی ہے تاکہ بے خوف ہوکر جرم کرتے رہیں۔