پابندی کے بعد اسمتھ کے لئے حمایت اور ہمدردی بڑھی
سڈنی ،30؍مارچ ( ایس او نیوز؍آئی این ایس انڈیا)بال ٹیمپرنگ معاملے میں سخت پابندی کے بعد روتے ہوئے معافی مانگنے والے آسٹریلوی کرکٹر سٹیو سمتھ کے لیے ہمدردی بڑھنے لگی ہے۔روتے ہوئے معافی مانگنے کے بعد کوچ ڈیرن لیہمن نے بھی استعفی دے دیا۔کپتان سمتھ اور نائب کپتان ڈیوڈ وارنر پر 12 ماہ کی پابندی عائد کی گئی۔حالانکہ اس کے بعد ٹیم کو کافی جارحانہ کہتے ہوئے کافی تنقید بھی ہوئی۔آسٹریلوی لیگ اسپنر شین وارن نے کہا کہ ہم سب اتنے دلبرداشتہ اور غصے میں ہیں، شاید ہمیں اتنا یقین نہیں تھا کہ اس پر کس طرح رد عمل کیا جائے۔ہم نے ایسا کچھ پہلے نہیں دیکھا تھا۔انہوں نے لکھاکہ لیکن اب چیزوں کو دیکھا جائے تو انہوں نے جو کچھ جرم کیا، یہ تنقید اس سے کہیں زیادہ نظر آرہی ہے۔ انگلینڈ کے سابق کپتان مائیکل وان نے کہا کہ سمتھ اور کیمرون بینکروفٹ اچھے کھلاڑی ہیں۔ انہوں نے کہاکہ انہیں دوسرا موقع ملنا چاہئے اور امید کرتا ہوں کہ انہیں اب چاروں طرف سے صحیح حمایت مل جائے گی۔انہوں نے آج جو کچھ کیا (معافی مانگی)، اس کے لئے کافی ہمت چاہئے۔