بنگلورو12؍ستمبر(ایس او نیوز) ریاستی وزیر مالگزاری آر وی دیش پانڈے نے بتایاکہ ریاست کے مرکیرہ ، کورگ ، دکشن کنڑا، ہاسن اور دیگر اضلاع میں طوفانی بارش ، سیلاب اور زمین کھسکنے کی وجہ سے مچی تباہی کا جائزہ لینے کے لئے مرکزی حکومت کی طرف سے اعلیٰ افسروں کی ٹیم بنگلور پہنچ رہی ہے۔

انہوں نے کہاکہ 12 اور13 ستمبر کو یہ ٹیم ریاست کے اعلیٰ افسروں کے ہمراہ مرکیرہ ، ہاسن اور دکشن کنڑا اضلاع کا دورہ کرے گی اور یہاں پر مچی تباہی کا از خود جائزہ لے گی۔ انہوں نے کہاکہ مرکزی ٹیم کی رہنمائی کے لئے متاثرہ اضلاع کے انچارج وزراء ، ڈپٹی کمشنرس اور دیگر تمام عہدیداروں کو موجود رہنے کی سخت ہدایت دی گئی ہے۔

انہوں نے کہاکہ مرکزی ٹیم کی طرف سے بارش کی وجہ سے ہلاک ورثاء میں وزیر اعظم مودی کی طرف سے معاوضے کی رقم تقسیم کی جائے گی۔انہوں نے کہاکہ مہلوکین کی ایک فہرست ریاستی حکومت کی طرف سے مرکز کو روانہ کی گئی ہے۔

انہوں نے کہاکہ ریاست کے چکبالاپور، کولار، منڈیا ، گدگ، کلبرگی، بیجاپور، اور بلاری میں بارش کی قلت کے سبب پینے کے پانی کا مسئلہ کھڑا ہوگیا ہے۔اس سے نپٹنے کے لئے 200کروڑ روپیوں کا خصوصی پیکیج منظور کیا گیا ہے۔ انہوں نے کہاکہ مرکزی حکومت کی طرف سے ریاست کو جو بھی مدد منظور کی جائے گی حکومت اس رقم سے فوری طور پر باز آباد کاری کے کاموں کی شروعات کرے گی۔ تاکہ آنے والے دنوں میں متاثرین کو پریشانی اٹھانے کی ضرورت نہ پڑے ۔