نئی دہلی ،07؍اپریل(ایس او نیوز؍ آئی این ایس انڈیا ) دہلی پولیس نے سی بی ایس ای کی 12ویں کلاس کے اکونامکس کا پیپر لیک ہونے کے سلسلے میں ہماچل پردیش کے ایک اسکول کے تین اسٹاف اراکین کو آج گرفتار کیا۔دہلی پولیس کے ایک سینئر افسر نے بتایا کہ ہماچل پردیش کے اونا ضلع میں ڈی اے وی اسکول کے مرکز سپرنٹنڈنٹ راکیش، کلرک امت اور چپراسی اشوک کو کرائم برانچ نے گرفتار کر لیا۔افسر نے بتایا کہ تینوں ملزمان کو اونا سے قومی دارالحکومت لایا گیا اور پوچھ گچھ کے بعد انہیں گرفتار کر لیا گیا۔12ویں کلاس کے 26 مارچ کو اکونامکس کے پیپر کے ایک دن پہلے پیپر کی کاپی وہاٹس ایپ پر لیک ہو گئی تھی۔سی بی ایس ای نے 30 مارچ کو اعلان کیا کہ 12 ویں کلاس کے اکونامکس کا پیپرملک بھر میں 25 اپریل کو دوبارہ ہوگا۔