نئی دہلی3جنوری(ایس او نیوز؍یواین آئی) اے پی کو خصوصی ریاست کادرجہ دینے کے مطالبہ پر ریاست کی حکمران جماعت تیلگودیشم کے ارکان پارلیمنٹ نے آج پارلیمنٹ میں گاندھی جی کے مجسمہ کے سامنے پلے کارڈس کے ساتھ احتجاج کیا۔ا ن ارکان پارلیمنٹ نے واضح کیا کہ ریاست سے مرکزی حکومت کے انصاف تک یہ احتجاج جاری رہے گااور مرکزکی ریاست سے شدید ناانصافیوں کو اجاگر کیا جائے گا۔ان ممبران پارلیمنٹ نے ریاست سے انصاف کرنے کا مطالبہ کیا۔
اس موقع پر میڈیا سے بات کرتے ہوئے پارٹی کے ان احتجاجی ارکان پارلیمنٹ نے اے پی کو خصوصی درجہ مرکز کی جانب سے نہ دیئے جانے اور اے پی سے انصاف نہ کرنے پر مودی زیرقیادت مرکزی حکومت پرشدید نکتہ چینی کی۔انہوں نے کہا کہ اے پی تنظیم نو قانون میں جو وعدے کئے گئے تھے ، ان تمام وعدوں پر عمل کیا جائے ۔ساتھ ہی پولاروم پروجیکٹ کیلئے مرکز سے وصول طلب فنڈس جاری کئے جائیں۔ضلع کڑپہ میں اسٹیل پلانٹ کا قیام عمل میں لایا جائے ۔انہوں نے کہاکہ اے پی کے لئے علاحدہ ریلوے زون کا بھی مرکزی حکومت کی جانب سے قیام عمل میں لایاجانا چاہئے ۔ان تمام مطالبات کی تکمیل تک یہ احتجاج جاری رہے گا۔
انہوں نے کہا کہ پارلیمنٹ میں جو وعدے اے پی کے ساتھ کئے گئے تھے ، ان وعدوں پر عمل کیاجانا چاہئے ۔سابق مرکزی وزیر و پارٹی کے رکن پارلیمنٹ اشوک گجپتی راجو نے اے پی سے انصاف کیلئے پارلیمنٹ میں کئے گئے وعدوں پر عمل نہ کرنے پر مودی زیرقیادت مرکزکی بی جے پی حکومت پر شدید نکتہ چینی کی۔انہوں نے کہاکہ ان وعدوں پر عمل کرنے کی ذمہ داری حکومت کی ہے ۔