بھٹکل:5/ستمبر(ایس اؤ نیوز) اس وقت دنیا میں کوئی نہ کوئی دن ، کسی نہ کسی مناسبت سے منایا جاتاہے ، یوم اساتذہ بھی ملک کے سابق صدر جمہوریہ رادھا کرشنن کے جنم دن پر منایاجاتاہے۔ ویسے یوم اساتذہ منائیں یا نہ منائیں ، اساتذہ کی اہمیت ، قدر، مقام اپنی جگہ مسلم ہے اور اللہ کے نبی ﷺ معلم انسانیت ہیں ۔ ہر ایک استاد کو ان سے رہنمائی حاصل کرنا ضروری ہے۔ ان خیالات کااظہار اسکول کے استاد مولوی ضیاء الرحمن رکن الدین ندوی نے کیا۔

وہ یہاں بھٹکل سے قریب شیرور کے  توحیدپبلک اسکول میں منعقدہ یوم اساتذہ کے پروگرام میں طلبا سے خطاب کررہے تھے۔ موصوف نے کہاکہ والدین کے بعد بچوں کے سب سے بڑے خیر خواہ استا د ہی ہوتے ہیں، وہ اپنی تمام معلومات بچوں کو دینے کے لئے محنت کرتے ہیں اور جانفشانی سے کام لیتے ہیں، یہ سب اسی لئے کہ بچے اپنی آگے کی منزلیں بحسن وخوبی طئے کرسکیں۔ طلبا کو چاہئے کہ وہ زندگی کے ہرموڑ پر اساتذہ کا ادب و احترام کریں۔ زندگی میں کسی سے کوئی ایک حرف بھی پڑھا ہو، سکھا ہوتو ان کے احسان مندر ہیں اصل میں یہی چیز انسان کو ترقی کی راہ پر لے جاتی ہے۔ ان کے بعد معلمہ نازیہ مس نے بھی رادھا کرشنن کی زندگی پر روشنی ڈالتے ہوئے خصوصیات بتائیں۔

پروگرام کا آغاز متعلم سمعان شیخ جی کی تلاوت قرآن سے ہوا۔ عمار پونگے نے ہدیہ نعت پیش کی۔ طلبا نے اساتذہ کے متعلق خوب صورت نظم سنائی  تو ایک طالبہ نے اساتذہ کی اہمیت پر تقریر کی۔ پروگرام کے دوران طلبابڑے جوش وخروش کے ساتھ مسکراتے ہوئے  تمام اساتذہ کی خدمت میں پھول، تحفے تقسیم کرنے کے علاوہ انہیں چاکلیٹ، کیک، مٹھائی وغیرہ بھی کھلائی ۔ کئی ایک طلبا نے اساتذہ کی قیمتی نصیحتوں کو آٹوگراف کے طورپر قلم بند کرتے دیکھا گیا۔ دعا پر جلسہ کا اختتام ہوا۔