ٹیکم گڑھ، 28؍اگست(ایس او نیوز/آئی این ایس انڈیا)وزیر اعظم نریندر مودی اور مدھیہ پردیش کے وزیر اعلی شیوراج سنگھ چوہان کے لئے ضرورت سے زیادہ تعریف ایک نوجوان کو مہنگی پڑی اور فوج میں شامل ہونے کا اس کا خواب ٹوٹ گیا۔اس ضلع میں جیرون گاؤں کے 10ویں کلاس پاس نوجوان سوربھ بل گیان مسلح افواج میں نوجوان کے طور پر شامل ہونا چاہتا تھا لیکن اس کے سینے پر بنے ٹیٹو ’’جب تک سورج چاند رہے گا، شیوراج ماما اور نریندر مودی کا نام رہے گا‘‘نے فوج میں شامل ہونے کا اس کا خواب چور چور کر دیا۔سوربھ نے کہاکہ اگرچہ سیاست میں میری کوئی دلچسپی نہیں ہے، میں چوہان اور مودی کا مداح ہوں اور 2013کے انتخابات کے دوران ان دو لیڈروں کے احترام کے طور پر میں نے اپنے سینے پر یہ نعرہ لگوایا۔انہوں نے کہا کہ تاہم جب میں 2014میں مہاراشٹر کے وماننگر میں فوج کے لئے بھرتی ریلی میں شامل ہونے گیا اور تحریری امتحان میں شامل ہونے کے بعد جسمانی ٹیسٹ کے لئے جب میں نے اپنی قمیض اتاری، بھرتی کرنے والے افسران نے مجھے اس نعرے کی وجہ سے فوج کے لئے نااہل قرار دے دیا۔اس نوجوان نے یہ دعوی بھی کیا کہ گنا، انوپ پور اور شوپری میں بھی ہوئی فوج کی بھرتی ریلیوں میں میرے ساتھ اسی طرح کا سلوک کیا گیا۔اس درمیان ریٹائرڈ کرنل وی کے سینی نے بتایا کہ ہم جسم پر کسی ٹیٹو کی اجازت نہیں دیتے کیونکہ اس سے جنگ کے میدان میں دشمن کو شخص کی شناخت اور مذہب بے نقاب ہو جاتا ہے۔