تملناڈو کے طوفان ’’گجا‘‘ کا اثر ریاست پر نہیں
بنگلورو، 13؍نومبر(ایس او نیوز) خلیج بنگال میں اٹھنے والے گجا طوفان کی وجہ سے ریاست کے موسم پر بہت زیادہ اثر نہیں پڑے گا۔ یہ بات ریاستی محکمۂ آفات سماوی کے نگراں ڈائرکٹر ڈاکٹر جی ایس سرینواس ریڈی نے بتائی ، انہوں نے کہاکہ اس طوفان کی وجہ سے ریاست کے ساحلی اور بعض جنوبی علاقوں میں بارش ہونے کا امکان ظاہر کیا جارہاتھا لیکن اب کہاجارہا ہے کہ اس طوفان کے تملناڈو کے ساحل تک پہنچ کر ٹکرانے سے پہلے ہی یہ کمزور پڑ سکتا ہے، اس وجہ سے تملناڈو اور کیرلا کے بعض علاقوں میں بھاری بارش کا اندیشہ ظاہر کیا گیاہے، انہوں نے کہاکہ اس کی وجہ سے کرناٹک کے کسی بھی علاقے میں بارش کا اثر دکھائی نہیں دے رہا ہے۔ انہوں نے بتایاکہ طوفان کے اثر سے 15اور 16نومبر کو ریاست کے جنوبی اور ساحلی علاقوں میں موسم ابر آلود ضرور ہوسکتا ہے، بعض علاقوں میں بارش ممکن ہے، لیکن طوفان کا اثر نہیں دیکھا جائے گا۔