چنئی23 مئی ( ایس او نیوز؍آئی این ایس انڈیا) تمل ناڈو حکومت نے توتی کورین تشدد کی تحقیقات کے لئے مدراس ہائی کورٹ کی ایک ریٹائرڈ جج کی سربراہی میں ایک رکنی انکوائری کمیشن قائم کیا ہے۔ کل ہوئے تشدد میں دس افرادکی ہلاکت ہو گئی تھی۔ ایک سرکاری پریس ریلیز میں یہاں بتایا گیا کہ احکام کی خلاف ورزی کرتے ہوئے ہزاروں لوگوں نے ضلع کلکٹریٹ کا محاصرہ کیا ۔ حکومت نے ریٹائرڈ جج کی قیادت میں ایک رکنی کمیشن تشدد کی تحقیقات کے لئے مقرر کیا ہے۔ وہ حکومت کو اپنی رپورٹ سو نپیں گے ۔ اگرچہ رپورٹ پیش کرنے کے لئے میعاد کا ذکر نہیں کیا گیا ہے۔ واضح ہو کہ آلودگی سے متعلق مسئلہ کو لے کر توتی کورین میں ویدانتا اسٹر لائٹ کاپر یونٹ کو مستقل طور پر بند کرنے کے مطالبات پر مبنی احتجاج پرتشدد ہو گیا تھا۔ جس میں پولیس اہلکاروں سمیت کئی لوگوں کو چوٹیں آئی تھیں۔ توتی کورین پولیس کے مطابق اس تشدد میں آٹھ مرد اور دو خواتین کی موت ہوئی ہے۔ مظاہرین نے پتھراؤ کیا اور سرکاری گاڑی اور عوامی املاک کو آگے کے حوالے بھی کردیا۔ اس کے بعد وہ پورے شہر میں توڑ پھوڑ شروع ہوگئی۔ یہ واقعہ چنئی سے قریب 600 کلو میٹر دور پیش آیا ۔