تمل ناڈو کے وزیراعلیٰ نے کسانوں سے ملاقات کی پی ایم کے سامنے معاملہ اٹھا نے کی یقین دہانی کرائی
نئی دہلی ،23؍اپریل (ایس او نیوز؍آئی این ایس انڈیا )دہلی کے جنترمنترپر دھرنے پر بیٹھے تمل ناڈو کے کسانوں سے ریاست کے وزیراعلیٰ ای پلانی سوامی نے ملاقات کی۔پلانی سوامی نے کہاہے کہ وہ کسانوں کے مطالبات کو وزیر اعظم نریندر مودی تک پہنچائیں اور ان سے کسانوں کی بھوک ہڑتال ختم کرانے کی اپیل کریں گے۔وہ نیتی آیوگ کی میٹنگ میں حصہ لینے دہلی پہنچے ہیں۔قابل ذکرہے کہ خشک سالی کی مارجھیل رہے تمل ناڈو کے کسان تقریباََ40دنوں سے دھرنے پر بیٹھے ہیں ، ان کا مطالبہ ہے کہ حکومت جلد سے جلد کسانوں کاقرض معاف کرے۔ہفتہ کو کسانوں نے پیشاب پی کر اپنا احتجاج درج کرایا تھا۔کسانوں نے انتبادہ دیاہے کہ اگران کے مطالبات نہیں مانے گئے ، تو وہ اتوار کو انسانی فضلہ بھی کھائیں گے۔اس سے پہلے تمل ناڈو کے کسانوں نے پی ایم اوکے باہربرہنہ ہوکر احتجاج بھی کیا تھا۔گزشتہ ایک ماہ سے زیادہ عرصے سے دھرنے پر بیٹھے یہ کسان برہنہ احتجاج سے لے کرچوہے کھانے اور سانپ کو منہ میں رکھنے جیسے طریقے اپنا چکے ہیں، وہ خود کشی کر چکے کسانوں کی کھوپڑیاں بھی ساتھ لے کرآئے ہیں لیکن مقصد صرف یہ ہے کہ مرکزی حکومت ان کے مسائل حل کردے لیکن نتیجہ وہی ڈھاک کے تین پات ہی رہاہے۔