کابل ،16اگست (ایس او نیوز؍آئی این ایس انڈیا)جنوبی افغان صوبے زابل میں طالبان عسکریت پسندوں کے حملے میں کم از کم چار پولیس اہلکار مارے گئے ہیں۔

صوبائی پولیس کے سربراہ مصطفیٰ معیار نے بتایا کہ عسکریت پسندوں نے صوبے کے دارالحکومت قلات کے باہر واقع سکیورٹی پوسٹوں پر حملے کیے ہیں۔ ان حملوں میں طالبان نے بھاری ہتھیار بھی استعمال کیے۔

مصطفیٰ معیار نے جوابی کارروائی میں سات حملہ آوروں کو ہلاک کرنے کا دعویٰ کیا ہے۔ یہ حملہ ایسے وقت میں کیا گیا جب گزشتہ روز طالبان نے ایک فوجی اڈے پر قبضہ کرتے ہوئے سترہ فوجیوں کو ہلاک کر دیا تھا اور اُدھر مشرقی شہر غزنی پر بھی عسکریت پسندوں نے حالیہ ایام میں چڑھائی کی تھی۔