ٹی20سریز :ہندوستان اور آسٹریلیا کے درمیان بدھ کو ہوگا پہلا میچ
برسبین،20؍ نومبر (آئی این ایس انڈیا؍ایس او نیوز)بدھ کو جب ٹی 20 بین الاقوامی سیریز کی شروعات ہوگی تو میدان کے اندر اور باہر خراب دور سے دوچار آسٹریلیائی ٹیم پر ہندوستان کا پلڑا بھاری ہوگا۔ایڈیلیڈ میں 6 دسمبر سے شروع ہونے والی ٹیسٹ سیریز کے لیے اپنا دعوی پختہ کرنے کے مقصد سے ہندوستان کا ہدف تینوں ٹی 20 میچ اپنی جھولی میں ڈالنے کا ہوگا۔
ہندوستانی ٹیم نے نومبر 2017 سے اب تک سات ٹی 20 سیریز جیتی ہیں۔اسے آخری بار ٹی 20 سیریز میں جولائی 2017 میں ویسٹ انڈیز نے ہرایا تھا۔گزشتہ آسٹریلیا دورے پر ہندوستان نے ٹی 20 سیریز 3.0سے اپنے نام کی تھی لہٰذا کھلاڑیوں کا اعتماد کافی بڑھا ہوگا۔دوسری طرف آسٹریلیائی ٹیم اسمتھ اور وارنر کی غیر موجودگی میں کچھ اچھی کارکردگی کرنے میں ناکام رہی ہے ۔کرکٹ آسٹریلیا نے منگل کو سٹیو سمتھ، ڈیوڈ وارنر اور کیمرون بینکروفٹ پر لگی پابندی کم کرنے سے انکار کر دیا۔وارنر اور سمتھ کی غیر موجودگی میں آسٹریلیائی ٹیم ویسے ہی کمزور ہو گئی ہے۔ دونوں پر لگی پابندی کے بعد سے آسٹریلیا ایک بھی ٹی 20 سیریز نہیں جیت سکا ہے۔اسے جون میں انگلینڈ نے شکست دی جبکہ زمبابوے میں ٹی 20 سیریز کے فائنل میں پاکستان نے شکست دی۔اس کے بعد یو اے ای میں پاکستان سے دو طرفہ سیریز 3.0 سے ہار گیا۔پھر جنوبی افریقہ نے بارش سے متاثر میچ میں شکست دی۔