عراق میں 3 سال سے لاپتہ ہیں 39ہندوستانی، سشما سوراج نے بحفاظت لوٹانے کا دیا بھروسہ
نئی دہلی،16/جولائی (آئی این ایس انڈیا)عراق کے موصل میں 39ہندوستانی لاپتہ ہو گئے ہیں۔وزیر خارجہ سشما سوراج نے اتوار کو کہا کہ لاپتہ ہندوستانی شہری شاید عراق کی ایک جیل میں قید ہیں۔انہوں نے کہا کہ ذرائع سے اطلاع ملی ہے کہ موصل کے قریب واقع بادش گاؤں میں ایک جیل ہے، امکان ہے کہ ہندوستانی شہری وہیں قید ہیں۔وزیر خارجہ نے بتایا کہ بادش گاؤں میں ان دنوں جنگ جاری ہے، ایسے میں وہاں کا ماحول پرسکون ہونے کے بعد ہی لاپتہ ہندوستانیوں کی تلاش کی جا سکے گی۔پریس کانفرنس سے پہلے سشما سوراج نے وزیر مملکت برائے خارجہ وی کے سنگھ اور ایم جے اکبر کے ساتھ تمام لاپتہ 39ہندوستانیوں کے خاندانوں سے ملاقات کی، لاپتہ ہوئے ہندوستانی شہریوں کا 2014سے ہی کوئی پتہ نہیں ہے۔اہل خانہ کو وزارت خارجہ کے تینوں وزراء سے یقین دہانی کرائی کہ وہ ان کے اپنوں کو محفوظ ہندوستان لانے میں ان کی ہر ممکن مدد کریں گے،لاپتہ ہندوستانیوں میں زیادہ تر پنجاب کے ہیں۔سشما سوراج نے کہاکہ جس دن عراق کے وزیر اعظم نے آئی ایس آئی ایس سے آزادی کا اعلان کیاتھا، اسی دن میں نے وی کے سنگھ کو اربل جانے کے لیے کہاتھا۔وہاں ذرائع نے انہیں بتایا کہ لاپتہ ہندوستانی ممکنہ طور پر بادش کی کسی جیل میں بند ہیں،یہاں پر جنگ ابھی ختم نہیں ہوئی ہے۔وزیر خارجہ نے عراق میں واقع ہندوستانی سفارت خانے اور ہوائی اڈوں پر کام کر رہے ایئر انڈیا کے حکام کو بھی لاپتہ ہندوستانیوں کے بارے میں معلومات جمع کرنے کو کہا ہے۔حالانکہ وزارت خارجہ لاپتہ ہندوستانی شہریوں کے زندہ ہونے کو لے کر پر یقین ہے۔