کمٹہ :5؍ڈسمبر (ایس او نیوز) شہر کے اہم راستوں کی توسیع کا منصوبہ لے کر شہری میونسپالٹی اور سروے افسران نے شہر کے مین روڈس کا سروے کام شروع کیا۔

27نومبر کو کمٹہ اسسٹنٹ کمشنر پریتی گہلوت کی صدارت میں تعلقہ پنچایت ہال میں  منعقد ہوئی میٹنگ میں اے سی نے شہر ی سطح پر درپیش ٹرافک مسئلہ کے پیش نظر ٹرافک نظام میں بہتری لانے کے لئے غور وفکر کیا گیا ۔ میٹنگ میں فیصلہ لیا گیا کہ شہر کے ٹرافک نظام کوبہتر بنانے کے لئے شہر کے  مستی کٹا سرکل سے ہلکار سرکل تک، بستی پیٹ سے گبس سرکل تک ،جئیونت اسٹوڈیو سے ونلی تک سمیت تمام مین روڈ کی توسیع کی جائے گی ۔ اے سی نے میٹنگ میں موجود میونسپالٹی چیف آفیسر سریش ایم کے سمیت تمام افسران کو ہدایات جاری کرتے ہوئے کہاکہ  وہ متعلقہ سڑکوں کا سروے کرکے راستے کے دونوں کناروں پر نکالے جانے والے سرکاری اور پرائیویٹ عمارتوں اور دکانوں کی تفصیلی   رپورٹ 15ڈسمبر تک سونپیں۔

منگل کو چیف آفیسر سمیت سروے افسران نے ہدایات کے مطابق  مستی کٹا سرکل سے سروے کام شروع کیا۔ موصولہ اطلاعات کے مطابق سڑک کے بیچ سے 6اور 9 میٹر کی پیمائش کرتےہوئے نشان لگائے جارہے ہیں۔ میونسپالٹی چیف آفیسر نے اس سلسلے میں دکانداروں اور عمارات کے مالکان سے تعاون کی اپیل کی ہے۔ بتایا جارہاہے کہ سروے رپورٹ کے بعد اگلی میٹنگ میں سڑک کی 12یا 18میٹر کی توسیع کے متعلق فیصلہ لیا جائے گا۔