نئی دہلی ،11؍ نومبر (ایس او نیوز؍آئی این ایس انڈیا) سی بی آئی تنازع پر سپریم کورٹ پیر کو مرکزی ویجلنس کمیشن (سی وی سی) کا موقف سنے گا۔عدالت نے سی وی سی کو ہدایت دی تھی کہ وہ سی بی آئی ڈائریکٹر آلوک ورما کے خلاف لگے الزامات کی اپنی ابتدائی تحقیقات دو ہفتے کے اندر مکمل کرے۔ مرکزی حکومت نے ورما سے سارے حقوق واپس لے کر انہیں چھٹی پر بھیج دیا ہے۔پیر کو ہونے والی سماعت اہم ہے کیونکہ ورما کے وی چودھری کی سربراہی میں سی وی سی کے سامنے پیش ہوتے رہے ہیں اور سمجھا جاتا ہے کہ انہوں نے سی بی آئی کے اسپیشل ڈائریکٹر راکیش استھانہ کے ذریعہ اپنے خلاف لگائے گئے الزامات کو خارج کردیا ہے۔ورما اور استھانہ نے ایک دوسرے پر بدعنوانی کے الزام لگائے تھے، جس کے بعد تنازعہ کافی بڑھ گیا تھا۔بعد میں مرکز نے دونوں افسران کو چھٹی پر بھیجا دیا اور دونوں سے ان کے سارے حقوق واپس لے لئے تھے۔مرکز کے انہی فیصلوں کو ورما نے عدالت میں چیلنج کیا ہے۔ گزشتہ سماعت میں چیف جسٹس رنجن گوگوئی کی صدارت والی تین رکنی بنچ نے ورما کی عرضی پر سماعت کی۔اب یہ معاملہ جسٹس گوگوئی اور جسٹس ایس کے کول کی دو رکنی بنچ کے سامنے درج ہے، جس پر پیر کو سماعت ہونی ہے۔دو رکنی بنچ سے اس معاملے کی سماعت کرنے کا فیصلہ اس وقت کیا گیا جب چیف جسٹس نے حال ہی میں صحافیوں سے اپنی غیر رسمی مذاکرات میں کہا کہ پیر اور جمعہ کو صرف دو اراکین والی بنچ بیٹھے گی۔ کورٹ نے عدالت کے سابق جج اے کے پٹنائک کو ورما کے خلاف سی وی سی تحقیقات کی نگرانی کا کام سونپا تھا۔گزشتہ 26 اکتوبر کو ورما کی عرضی پر ہوئی سماعت میں عدالت عظمی نے مرکز اور سی وی سی کو نوٹس جاری کیا تھا اور سی وی سی کو جانچ مکمل کرنے کے لئے دو ہفتے کا وقت دیا تھا۔