نتیش جی کے ان دوتکیہ کلام نے بہار کا بیڑا غرق کر دیا: تیجسوی یادو
نئی دہلی25 ستمبر (ایس او نیوز؍آئی این ایس انڈیا) بہار کے مظفر پور میں سابق میئر سمیر کمار کے قتل کے معاملے میں آر جے ڈی لیڈر تیجسوی یادو نے نتیش حکومت پر جم کر حملہ کیا۔ بہار کے سابق وزیر اعلی تیجسوی یادو نے ایک کے بعد ایک کئی ٹویٹ کر وزیر اعلی نتیش کمار اور ڈپٹی سی ایم سوشیل کمار مودی پر نشانہ لگایا۔ واضح ہو کہ مظفر پور کے شہری تھانہ کے تحت فائر بریگیڈ آفس کے قریب اتوار کی شام AK-47 سے لیس مجرموں نے سمیر کمار کا گولی ماکر قتل کر دیا تھا۔تیجسوی یا دو نے ٹویٹ کر کہا کہ نتیش حکومت کی ناکامیوں سے بہار میںAK-47 ایک عام ہتھیار بن گیا ہے ۔ اس کے ساتھ ہی تیجسوی یادو نے اپنے ٹویٹ میں اس سال کے تین بڑے قتل کا بھی ذکر کیا۔انہوں نے ٹویٹ کیا کہ مظفر پور میں سابق میئر کو دن دہاڑےAK-47 سے قتل کردیا گیا ۔نتیش کمار کی ناکامیوں سے بہار میںAK-47ایک معمولی ہتھیا ربن گیا ہے۔ اس کے علاوہ انہوں نے اپنے ٹویٹ میں لکھاکہ سمستی پور میں تاجرکا قتل، پٹنہ میں ڈاکٹر کا قتل، موتیہاری میں طالب علم کا قتل ہوا ؛لیکن سرکار تماشہ دیکھتے رہ گئی ۔ تیجسوی یادو نے ایک اور ٹوئٹ میں وزیر اعلی نتیش کمارکی تنقید کی ۔ انہوں نے ٹویٹ کیا کہ نتیش کمار کے ان دو تکیہ کلام نے بہار کا بیڑا غرق کر دیا ہے۔ پہلے یہ کہ بہار میں قانون کا راج ہیں،قانون اپنا کام کرے گا اور دوسرا ہم نہ کسی کو پھنساتے ہیں، نہ کسی کو بچاتے ہیں۔ نتیش کمار جی کے ان دو تکیہ کلام نے بہار کا بیڑا غرق کر دیا ہے، کیونکہ کسی کو پھنساتے ہیں تب بھی یہی رٹا رٹایا بولتے ہیں اور بچاتے ہیں تب بھی یہی گھسا پٹا ڈائیلاگ دہراتے ہیں ۔ سابق نائب وزیر اعلی تیجسوی یادو نے اس کے بعد نائب وزیر اعلی سوشیل مودی کی بھی تنقید کی۔