2 جی معاملے میں سی بی آئی،ای ڈی کو سرپیم کورٹ سے پھٹکار، چھ ماہ کے اندر تحقیقات کا حکم
نئی دہلی،12؍ مارچ (ایس او نیوز؍آئی این ایس انڈیا) سپریم کورٹ نے مرکزی تفتیشی بیورو اور ای ڈی کو ہدایت دی کہ ٹو جی اسپیکٹرم معاملے اور اس سے متعلق دوسرے معاملات کی تفتیش چھ ماہ کے اندر مکمل کی جائے۔جسٹس ارون مشرا اور جسٹس نوین سنہا کی دو رکنی بنچ نے مرکز کو ٹو جی سپیکٹرم کیس اور ایئرسیل ۔میکسک سودے سمیت اس سے منسلک معاملات کی جانچ کی پیش رفت رپورٹ دو ہفتوں کے اندر پیش کرنے کی ہدایت دی۔بنچ نے اس معاملے کی سماعت کے دوران تبصرہ کیا کہ یہ تحقیقات کافی وقت سے چل رہی ہے اور ملک کے عوام کو اس طرح کے حساس معاملے میں زیادہ وقت تک اندھیرے میں نہیں رکھا جا سکتا۔عدالت عظمی نے سینئر وکیل آنند گروور کو ٹو جی معاملات میں خصوصی لوک پراسیکیوٹر کی ذمہ داری سے بھی آزاد کر دیا۔اس کے ساتھ ہی عدالت نے اضافی سالسیٹر جنرل تشار مہتا کو ٹو جی اسپیکٹرم معاملات کے لیے مخصوص پبلک پراسیکیوٹر مقرر کرنے کے مرکز کے فیصلے کو بھی منظوری دے دی۔ عدالت نے اسی معاملے میں ایک غیر سرکاری تنظیم کی طرف سے دائر پٹیشن بھی مسترد کر دی۔