سولیا14؍فروری (ایس او نیوز) اسکول بس سے گھرواپسی کے بعد حادثاتی طور پر اسی بس کے ٹائروں کے نیچے کچل جانے سے ایک 6سالہ طالبہ ہلاک ہوگئی ہے۔

موصولہ رپورٹ کے مطابق ہلاک ہونے والی بچی کانام اگنیا بالوجو فرسٹ اسٹانڈرڈ کی طالبہ تھی۔ جب وہ اسکول بس سے نیچے اتری اور اپنے گھر کی طرف آگے بڑھنے ہی والی تھی تواسے یاد آیا کہ اس نے اپنا لنچ باکس بس میں ہی چھوڑ دیا ہے۔ اس نے پلٹ کر بس میں موجود اپنے ساتھی طلباء کو آواز دی کہ کوئی اسے کھڑکی سے لنچ باکس لوٹا دے ۔ کچھ طلبا نے جب لنچ باکس اس کی طرف بڑھا یا اور وہ لپک کر باکس لینے کی کوشش کررہی تھی توبے خبر ڈرائیور نے بس آگے بڑھا دی اس وقت اگنیا اپنا توازن قائم نہ رکھتے ہوئے نیچے گرپڑی اور بس کے ٹائروں کے نیچے دب گئی، جس کے نتیجے میں وہ شدید زخمی ہوگئی۔

زخمی اگنیا کو پہلے سولیا کے ایک اسپتال لے جایا گیاپھراس کے بعد مزید علاج کے منگلورو کے اسپتال میں داخل کیا گیا،لیکن زخموں کی تاب نہ لاتے ہوئے اس نے دم توڑ دیا۔کہا جاتا ہے کہ سنگل ڈور اسکو ل بس میں کوئی کنڈکٹر یا آیا کا انتظام نہیں تھا جوبچوں کی نگہداشت کے ضروری ہوتا ہے۔اس تعلق سے پولیس نے شکایت درج کرلی ہے۔