مینگلور کے قریب سولیا میں لڑکے نے اپنے ہی کالج کی لڑکی کو چھرا گھونپ دیا؛ خودکشی کی ناکام کوشش کے بعد گرفتار؛ محبت میں ناکامی کا شبہ
مینگلور 21/فروری (ایس او نیوز) یہاں سے قریب 85 کلو میٹر دور سولیا میں پیش آئے ایک اندوہناک واقعے میں کالج کی ایک طالبہ کی موت واقع ہوگئی، جبکہ اس کو چھرا گھونپنے والے طالب العلم کو خودکشی کی ناکام کوشش کے بعد گرفتار کرلیا گیا۔ واردات منگل کی شام قریب 4:30 بجے پیش آئی۔ مہلوک طالبہ کی شناخت اکشتھا کی حیثیت سے کی گئی ہے جو سولیا کے نہرو میموریل کالج میں سکینڈ بی ایس سی میں زیرتعلیم تھی۔ وہ پڑوسی ریاست کیرالہ کے کاسرگوڈ ضلع کے ملیریّا شانتی نگر کی رہنے والی تھی۔
ذرائع نے بتایا کہ اکشتھا کالج کے کلاسس اٹینڈ کرنے کے بعد روٹری اسکول کے قریب سے گذر رہی تھی کہ اچانک کارتیک نامی اسی کے کلاس کا طالب العلم وہاں پہنچ گیا اور اکشتھا کے پیٹ میں آٹھ بار پے درپے چاقو گھونپ دیا۔ بعد میں اس نے اپنے ہی ہاتھ کی نس کاٹنے کی کوشش کی۔
بتایا گیا ہے کہ شدید طور پر زخمی اکشتھا کو فوری طور پر قریبی اسپتال لے جایا گیا، جہاں سے ابتدائی طبی امداد کے بعد مینگلور منتقل کیا جارہا تھا کہ راستے میں ہی اُس نے دم توڑ دیا۔ ہاتھ کو چاقو مار کر زخمی ہونے والے کارتیک کو مقامی اسپتال میں لے جانے کے بعد گرفتار کرلیا گیا ہے۔
پولس ذرائع کے مطابق کارتیک نے بتایا ہے کہ وہ اکشتھا سے محبت کرتا تھا، مگر اکشتھا نے اُس کی محبت کو ٹھکرادیا تھا، جس سے مشتعل ہوکر اُس نے یہ واردات انجام دی ۔ پولس نے ایک دن کی کسٹدی کے بعد کارتیک کو بدھ کی صبح عدالت میں پیش کیا جہاں سے عدالت نے اُسے جوڈیشل کسٹڈی میں بھیج دیا ہے۔