اُترکنڑا کے سُودّی ٹی وی نیوز چینل کے رپورٹرکی بائک درخت سے ٹکراگئی؛ رپورٹر کی موقع پر موت
بھٹکل 14/جنوری (ایس او نیوز) سرسی سے ہانگل جانے کے دوران ایک کنڑا نیوز چینل کے رپورٹر کی بائک تیز رفتاری کے ساتھ ایک درخت سے ٹکرانے کے نتیجے میں موقع پر ہی اُس کی موت واقع ہوگئی۔ یہ حادثہ اتوار کو ضلع ہاویری کے ہانگل کے قریب گُنڈورو نامی دیہات میں علی الصباح پیش آیا۔
سودّی نیوز چینل کا ضلع اُترکنڑا کا ٹی وی رپورٹر مونیش پوتّوراج (28) سرسی میں سنیچر کو ہوئے ریاستی کنونشن "ہمارا دستور ہمارا فخر " کی کوریج کے بعد رات کو ہی اپنی رہائش گاہ گدگ ضلع کے شرہٹی تعلقہ کے چھبّی دیہات جانے کے لئے بائک پر نکلا تھا۔ بتایا گیا ہے کہ اس کی بائک ایک تنگ موڑ پر بے قابو ہوگئی اور سڑک سے اُتر کر قریبی درخت سے ٹکراگئی۔ ٹکر اتنی شدید تھی کہ مونیش کی موقع پر ہی موت واقع ہوگئی۔
حادثے کی اطلاع ملتے ہی ہانگل پولس کا عملہ جائے وقوع پر پہنچا اور ضروری کاغذی کاروائیوں کے بعد نعش کو پوسٹ مارٹم کے لئے بھیج دیا۔
مونیش ایک بہترین انسان: مونیش نہ صرف ایک بہترین انسان تھا، بلکہ ایک بہترین رپورٹر بھی تھا جو پورے ضلع اُترکنڑا کی خبرو ں کا احاطہ ایمانداری کے ساتھ کرتا تھا۔ بھٹکل میں ساحل آن لائن کے ا یڈیٹر سمیت رپورٹروں سے بھی اچھے تعلقات تھے اور بھٹکل میں کسی بھی طرح کی خبروں کے لئے ساحل آن لائن سے برابر رابطے میں رہتا تھا۔ اس کی اچانک موت پر ادارہ ساحل آن لائن نے گہرے رنج وغم کا اظہار کیا ہے اور گھروالوں کے ساتھ تعزیت کرتے ہوئے اُن کو صبر کرنے کی تلقین کی ہے۔
مونیش کی میت کچروں کی گاڑی پر ڈال کر لے جانے پر رپورٹروں کی سخت ناراضگی: مونیش کی موت کے بعد اُس کی میت کو ایک کچرہ اُٹھانے والے ٹریکٹر پر ڈال کر لے جانے کی وڈیو سوشیل میڈیا میں وائرل ہونے کے بعد ضلع بھر کے رپورٹروں نے سخت ناراضگی ظاہر کی ہے ۔ بتایا گیا ہے کہ ہانگل پولس نے اس کی نعش کو ایک کچرہ لے جانے والے ٹریکٹر پر ڈال کر سرکاری اسپتال لے گئے تھے، جس پر سوشیل میڈیا میں پولس کی جم کر مذمت کی گئی اور پولس کے اعلیٰ حکام سے درخواست کی گئی کہ وہ خاطی پولس اہلکاروں کے خلاف کاروائی کریں۔ ایسے میں پولس کی طرف سے وضاحت جاری کی گئی ہے کہ ہانگل میں میت لے جانے کے لئے کوئی متبادل انتظام نہ ہونے کی وجہ سے مجبوراً کچروں کو اُٹھانے والے ٹریکٹر پر ڈال کر میت اسپتال لے جائی گئی تھی۔
