دبئی میں منعقدہ کینرا مسلم خلیج کونسل کے مشاورتی اجلاس میں ایمبولنس سروس اور آئی ٹی آئی کالج کے عنقریب افتتاح کا فیصلہ
دبئی 5/اکتوبر (ایس او نیوز) حال ہی میں دبئی میں ہوئے کینرا مسلم خلیج کونسل کے مشاورتی اجلاس میں دو اہم فیصلے لئے گئے جس کے مطابق پیرا میڈیکل ایمبولنس سروس کا عنقریب اجراء کرنا اور مرڈیشور میں آئی ٹی آئی کالج کا عنقریب افتتاح کرنا طئے پایا ہے۔
کینرا مسلم خلیج کونسل کے سکریٹری کی جانب سے جاری کی گئی پریس ریلیز کے مطابق مشاورتی اجلاس مورخہ 27ستمبر 2018 بروز جمعرات بعد نماز عشاء شہر دبئی میں صدر عبدالقادر باشہ رکن الدین محمدباپو کی صدارت میں منعقد ہوا، جس میں کونسل کے کثیر تعداد میں اراکین نے حصہ لیا۔
سکریٹری کے مطابق اجلاس میں اندرون امارات ممبر جماعتوں کے علاوہ بیرون امارات قائم ممبر جماعتوں نے حاضری دیکر کینرا کونسل کے مشاورتی اجلاس کو بے حد کامیاب بنانے میں اہم کردار ادا کیا-
اجلاس میں سیکریٹری جنرل جناب ابومحمد مختصر صاحب نے جدہ کانفرنس بتاریخ 30 مارچ 2018 سے ستمبر 2018 تک کی کاروائی کی تفصیلی رپورٹ پیش کی۔ بعد ازاں اس مشاورت میں چند اہم مسائل پر غور کیا گیا اور عملا مفوضہ ذمے داریوں کو انجام دینا طئے پایا ۔
1) جدہ کانفرنس میں منظور شدہ تجویز ائی ٹی ائی (I T I) کا مکمل خاکہ جناب امین سیف اللہ صدر مرڈیشور جماعت المسلمین نے پیش کیا۔ معلوم رہے کہ اس تعلیمی پروچیکٹ کو مرڈیشور مسلم خلیج کونسل نے بخوشی قبول کیا تھا ۔
2) ایک روزہ ڈاکٹر کانفرنس کو دبئی میں رکھنا طئے پایا ۔ اسی طرح صحت عامہ کے تناظر میں پیرا میڈیکل ایمبولنس سروس کے اجراء پر غور ھوا اس سروس کو جاری کرنے کےلئے مرڈیشور و منکی جماعت کے ذمے داروں نے باھم مشورے کے بعد ایمبولنس سروس شروع کرنے کا اسی اجلاس میں اعلان کیا۔
3) اسی طرح ممبر جماعتوں نے موجودہ حالات و ضروریات کو سامنے رکھتے ہوئے جدید میڈیکل نقطہ نظر سے بہترین طبی سہولیات سے آراستہ اسپتال کے قیام پر زور دیا ۔
4) سی یم کے سی رابطہ آفیس کو مرڈیشور میں قائم کرنا طئے پایا ۔
پروگرام کا آغاز حافظ عبدالخالق گیما کی تلاوت قرآن مجید سے ہوا تھا۔ جناب عبدالرحمن صدیقی نے مہمانوں کا استقبال کیا ۔ فضل الرحمن جوکاکو نے ڈاکٹر کانفرنس رپورٹ کا خلاصہ پیش کیا حاضرین اجلاس کا شکریہ ارشاد علی افریقہ ندوی نےادا کیا ۔ اجلاس کی نظامت مولوی ابرارالحق موٹیا ندوی نے انجام دی مولانا سید ھاشم یس یم ندوی کی پر سوز دعا پر اجلاس اختتام پذیر ہوا۔