کاروار میں ہوئے پرتیبھا کارنجی مقابلوں میں بھٹکل علی پبلک اسکول کے طالب العلم کو ملا قرات میں اول مقام؛ انجمن کے طالب العلم کو نظم میں دوم مقام
بھٹکل9/اکتوبر (ایس او نیوز) کاروار میں ہوئے پرتیبھا کارنجی مقابلوں میں بھٹکل کے علی پبلک اسکول کے طالب العلم ابراہیم امتیاز نے ہائی اسکول لیول کے قرات مقابلوں میں ضلع بھر میں اول مقام حاصل کرتے ہوئے شہر سمیت اسکول کا نام روشن کیا ہے۔ ابراہیم آٹھویں کلاس کا طالب العلم ہے جس نے اس سے قبل کلسٹر لیول اور تعلقہ لیول پر اول مقام حاصل کرتے ہوئے ڈسٹرکٹ لیول کے لئے منتخب ہوا تھا۔ علی پبلک اسکول کے جنرل سکریٹری مولوی الیاس جاکٹی ندوی نے اخبارنویسوں سے گفتگو کرتے ہوئے بتایا کہ ابراہیم اب کاروار میں اول مقام حاصل کرنے کے بعد وہ اسٹیٹ لیول مقابلے کے لئے منتخب ہوگیا ہے۔ ضلعی لیول پر ابراہیم کو اول مقام حاصل ہونے پر اسکول انتظامیہ نے نہایت خوشی کا اظہار کرتے ہوئے اُسے مبارکباد پیش کی ہے۔
پرتیبھا کارنجی میں انجمن اُردو پرائمری اسکول کے ایک طالب العلم آرباز فیاض ابن اسرار نے اُردو نظم کے مقابلوں میں ضلع بھر میں دوسرا مقام حاصل کیا ہے۔انجمن کی جانب سے جاری کردہ پریس ریلیز میں بتایا گیا ہے کہ آرباز چوتھی جماعت کا طالب العلم ہے۔ ریلیز میں بتایا گیا ہے کہ اُردو نظم میں آرباز نے بھٹکل تعلقہ میں اول مقام حاصل کیا تھا۔ انجمن نے ان کی کامیابی پر مبارکباد پیش کی۔