ٹرمپ کے ساتھ تعلق: امریکہ کی خاتون اداکارہ نے جاری کردی دھمکی دینے والے شخص کی تصویر
واشنگٹن،18؍اپریل (ایس او نیوز؍آئی این ایس انڈیا )امریکا میں فحش فلموں کی خاتون اداکارہ اسٹورمی ڈینئلز نے ایک شخص کا تصویری خاکہ جاری کیا ہے اور دعوی کیا ہے کہ یہ وہی شخص ہے جس نے لاس ویگاس میں اسٹورمی کو دھمکی دی تھی کہ وہ امریکی صدر ڈونلڈ ٹرمپ کے ساتھ اپنے تعلقات کے حوالے سے خاموشی اختیار کرے۔اسٹورمی نے اس خاکے کا انکشاف امریکی نیوز چینل ABC پر نشر ہونے والے ایک پروگرام کے دوران کیا۔ اسٹورمی کے مطابق مذکورہ شخص کی جانب سے 2011 میں دھمکی دی گئی تھی تا کہ وہ 2006 میں ٹرمپ کے ساتھ اپنے تعلقات کے حوالے سے زبان نہ کھولے۔اسٹورمی ڈینئلز جس کا اصل نام اسٹیفنی کلیفرڈ ہے کا کہنا ہے کہ اْس وقت حکام کو دھمکی سے آگاہ نہیں کیا گیا کیوں کہ وہ ڈری ہوئی تھی۔اسٹورمی کے مطابق "میں نہیں چاہتی تھی کہ میرے خاندان کے سامنے اس کا انکشاف ہو اور میرے سر پر آسمان ٹوٹ پڑے"۔اسٹورمی کا کہنا ہے کہ اس نے 2006 میں ایک مرتبہ ٹرمپ کے ساتھ تعلق قائم کیا تھا۔ ٹرمپ کے ذاتی وکیل مائیکل کوہین نے اسٹورمی کو زبان بند رکھنے کے لیے 2016 کے انتخابات سے قبل 1.3 لاکھ ڈالر ادا کیے تھے۔اسٹورمی کے وکیل کا کہنا ہے کہ تصویری خاکے میں جس شخص کو دکھایا گیا ہے اس کی شناخت کے بارے میں معلومات فراہم کرنے والے کو ایک لاکھ ڈالر پیش کیے جائیں گے۔