بنگلورو،23؍اکتوبر(ایس او نیوز؍عبدالحلیم منصور) سابق وزیر اعلیٰ اور ریاستی بی جے پی صدر بی ا یس یڈیورپا نے کہاکہ 2؍ نومبر کو بی جے پی کے قومی صدر امیت شاکی قیادت میں پارٹی کی طرف سے شروع کی جانے والی پرورتن ریلی کے مرحلے میں ریاستی کانگریس حکومت کے بعض وزراء اور اراکین اسمبلی باضابطہ بی جے پی میں شامل ہوجائیں گے۔آج بی جے پی دفتر میں مرکزی وزیر سدانند گوڈا ، اراکین پارلیمان پی سی موہن ، شوبھا کارند لاجے اور پارٹی لیڈر آر اشوک کے ہمراہ پرورتن ریلی کے متعلق ایک اخباری کانفرنس سے خطاب کرتے ہوئے انہوں نے کہاکہ کانگریس اور جے ڈی ایس کے متعدد اراکین اسمبلی بی جے پی میں شمولیت کیلئے ایک ٹانگ پر کھڑے ہوئے ہیں۔ اسی لئے بی جے پی قیادت نے طے کیاہے کہ 2؍ نومبر کو امیت شا کی موجودگی میں ساحلی کرناٹک سے آنے والے ایک سینئر کانگریس وزیر اور بعض اراکین اسمبلی کو پارٹی میں شمولیت کا موقع دیا جائے۔ انہوں نے دعویٰ کیاکہ ساحلی کرناٹک سے ایک اور وزیر بھی بی جے پی میں شامل ہونے والے ہیں، جملہ پندرہ تا بیس اراکین اسمبلی کی پارٹی میں شمولیت متوقع ہے۔ انہوں نے کہاکہ آپریشن کمل کے ذریعہ بی جے پی نے کانگریس اور جنتادل (ایس) کے اراکین اسمبلی کواپنی جانب راغب کرنے میں کامیابی حاصل کرلی ہے۔ پارٹی کے قومی صدرامیت شا خود ان اراکین اسمبلی کا پارٹی میں استقبال کریں گے۔ اس کے علاوہ چند سابق وزراء اور سابق اراکین اسمبلی بھی اس موقع پر بی جے پی میں شمولیت اختیار کرنے والے ہیں۔ یڈیورپا نے کہاکہ 2؍ نومبر سے شروع ہونے والی پرورتن یاترا ریاست بھر میں 75دن چلے گی اور 28جنوری کو مکمل ہوگی۔اس دن بنگلور کے نیشنل کالج میدان میں ایک بہت بڑا جلسۂ عام منعقد ہوگا ،جس میں وزیراعظم نریندر مودی کی موجودگی میں ریاست کے اور بھی وزراء اور اراکین اسمبلی بی جے پی میں شامل ہوں گے۔ ساحلی اور شمالی کرناٹک سے وابستہ ان وزراء اور اراکین اسمبلی کی مدد سے بی جے پی اگلے انتخابات میں 150 سے زائد اسمبلی سیٹوں پر کامیابی حاصل کرے گی۔