بی پی ایل راشن کارڈوں کیلئے ماہانہ ایک لیٹر مٹی کا تیل:یوٹی قادر
بنگلورو،27؍فروری(ایس او نیوز) دیہی علاقوں میں ایل پی جی کنکشن رکھنے والے خاندانوں کو بھی بی پی ایل راشن کارڈ کے ذریعہ ماہانہ ایک لیٹر مٹی کا تیل مہیا کرانے کا ریاستی حکومت نے فیصلہ کیا ہے۔ یہ بات آج وزیر برائے شہری رسد وخوراک یوٹی قادر نے کہی۔ اخباری نمائندوں سے بات چیت کرتے ہوئے انہوں نے کہاکہ جن خاندانوں کے پاس بی پی ایل راشن کارڈ ہو اور وہ ایل پی جی کنکشن رکھتے ہیں مرکزی حکومت نے انہیں مٹی کا تیل مہیا کرانے کا سلسلہ منسوخ کردیاتھا، لیکن دیہی علاقوں میں مٹی کے تیل کی مانگ کو دیکھتے ہوئے ریاستی حکومت نے اپنے طور پر ایک لیٹر مٹی کا تیل مہیا کرانے کا منصوبہ بنایا ہے۔ وزیراعلیٰ سدرامیا نے اس تجویز کو منظوری بھی دے دی ہے۔ انہوں نے کہاکہ مٹی کے تیل کی فراہمی کا یہ سلسلہ یکم مارچ سے رائج ہوگا۔ گیس کنکشن رکھنے والے خاندانوں کو اپنی راشن کی دکان میں یہ درخواست دینی ہوگی کہ انہیں مٹی کا تیل درکار ہے۔ محکمہ کی منظوری کے بعد انہیں مٹی کا تیل مہیا کرایا جائے گا۔انہوں نے کہاکہ جن خاندانوں کے پاس ایل پی جی کنکشن نہیں ہے انہیں ماہانہ تین لیٹر مٹی کا تیل فراہم کیا جائے گا۔اس موقع پر وزیر موصوف نے بتایاکہ شہری رسد نظام کے تحت راشن کارڈوں پر دی جانے والی شکر کی رعایتی قیمت پر فراہمی کے سلسلے کو مرکزی حکومت نے روک دیا ہے۔ ریاستی حکومت نے بھی محسوس کیا ہے کہ شہری رسد نظام کے تحت رعایتی قیمت پر شکر کی فراہمی دشوار ہے۔ مرکزی حکومت نے اگر سبسیڈی فراہم نہیں کی تو کسی بھی راشن کارڈ پر شکر کی قیمت میں رعایت بالکل نہیں دی جائے گی۔