ماہی گیر کشتی لاپتہ ہونے کے معاملے میں مرکزی وزیر اننت کمار ہیگڈے سیاست نہ کریں۔ ریاستی وزیر داخلہ ایم بی پاٹل کا بیان
سرسی 5؍جنوری (ایس او نیوز)ملپے بندرگاہ سے سمندر میں ماہی گیری کے لئے نکلی ہوئی کشتی لاپتہ کاسراغ ابھی تک نہیں مل سکا ہے۔ مگر اس سلسلے میں سیاسی بازیگری بھی شروع ہوگئی ہے۔اسے بی جے پی کی طرف سے ریاستی حکومت کی ناکامی بناکر پیش کیا جارہا ہے۔اس سلسلے میں مرکزی وزیر اننت کمار ہیگڈے نے جو بیان دیا ہے اسے ریاستی وزیر داخلہ ایم بی پاٹل نے غیر ذمہ دارانہ قرار دیتے ہوئے اس مسئلے پر سیاست نہ کرنے کا مشورہ دیا ہے۔
اڈپی میں ماہی گیروں کے ساتھ ملاقات کے لئے دورے پر جاتے وقت ضلع شمالی کینرا کے یلاپور میں اخباری نمائندوں سے بات چیت کرتے ہوئے ریاستی وزیر داخلہ نے کہا کہ اننت کمار کو چاہیے کہ اس حساس مسئلے پر سیاست نہ کرتے ہوئے لاپتہ ماہی گیروں کو تلاش کرنے کے لئے مرکزی حکومت کا تعاون فراہم کریں۔خیال رہے کہ اننت کمار ہیگڈے نے گم شدہ کشتی او رماہی گیروں کو تلاش کرنے میں ناکامی کو حکومت کی کوتاہی قرار دیا تھا اور کہا تھا کہ ماہی گیروں کو کشتی سمیت دہشت گردوں کی طرف سے اغوا کیے جانے کے امکانا ت ہیں۔
وزیرداخلہ ایم بی پاٹل نے کہا کہ اننت کمار ہمیشہ تنازعات کھڑے کرنے کی عادت ہوگئی ہے۔ انہیں اس طرح کا غیر ذمہ دارانہ بیان نہیں دینا چاہیے ۔ گم شدہ ماہی گیروں میں ضلع شمالی کینرا کے دو افراد بھی شامل ہیں۔ مقامی رکن اسمبلی ہونے کی وجہ سے انہیں ان ماہی گیروں کی تلاش میں خود اپنا کردار اداکرنا چاہیے۔