ریاستی کابینہ میں توسیع یا ردوبدل فی الوقت نہیں: سدرامیا
بنگلورو۔16؍جنوری(ایس او نیوز) وزیر اعلیٰ سدرامیا نے کہاکہ فی الوقت وہ اپنی ریاستی کابینہ میں توسیع یا ردوبدل نہیں کریں گے۔آج سی آئی ڈی دفتر میں اعلیٰ پولیس عہدیداروں کی میٹنگ سے قبل اخباری نمائندوں سے بات چیت کرتے ہوئے وزیراعلیٰ نے کہاکہ وزارت کی دو مخلوعہ نشستوں کو پرکرنے کے بارے میں ابھی غور خوض نہیں ہوا ہے۔حال ہی میں وزیر کوآپریشن مہادیوپرساد کے فوت ہونے اور جنسی اسکینڈل میں ملوث ایچ وائی میٹی کے استعفیٰ دینے کے سبب دو وزارتیں خالی ہوئی ہیں، جنہیں حاصل کرنے کیلئے وزارت کے دعویداروں میں دوڑ لگی ہوئی ہے۔ سینئر اراکین اسمبلی کی طرف سے ان وزارتوں کو حاصل کرنے کیلئے سدرامیا پر دباؤ بھی ڈالا جارہاہے۔ شمالی کرناٹک سے کربا فرقہ کی نمائندگی کرنے والے میٹی کو برطرف کئے جانے کے بعد اسی طبقے کے کسی اور لیڈر کو وزارت دینے کیلئے سدرامیا پر زور دیا جارہاہے، جبکہ مہادیو پرساد کی موت کے سبب مخلوعہ وزارت میں کسی لنگایت فرقہ کے لیڈر کومقرر کرنے کی کوششیں تیز ہوگئی ہیں تاہم وزیر اعلیٰ کی طرف سے اس وضاحت کے بعد کہ ریاستی کابینہ میں ردوبدل زیر غور نہیں ہے، ان وزارتوں کے دعویداروں کی امیدوں پر پانی پھرتا نظر آرہا ہے ۔