بنگلورو:28/مارچ(ایس او نیوز)وزیر اعلیٰ سدرامیا نے کہاکہ برہت بنگلور مہانگر پالیکے کے تمام 198 وارڈوں میں نما کینٹین شروع کرنے کا ریاستی حکومت نے بجٹ میں جو منصوبہ اعلان کیا ہے اسے آنے والے دنوں میں اندرا کینٹین پکارا جائے گا۔آج اسمبلی میں بجٹ بحث کے جواب کے دوران سدرامیا نے کہاکہ بہت جلد ان کینٹینوں کی شروعات کا حکمنامہ باضابطہ جاری کردیا جائے گا اور اندرا کینٹین شہر کے 198مقامات پر کام کرنے لگیں گے۔ وزیر اعلیٰ سدرامیا نے جیسے ہی اپنی تقریر کے دوران نما کینٹین کا تذکرہ کیا حکمران پارٹی ممبران نے مطالبہ کیا کہ اس کینٹین کو اندرا کینٹین پکارا جائے، اسے منظور کرتے ہوئے وزیر اعلیٰ نے کہاکہ جلد ہی اس سلسلے میں حکمنامہ جاری کیا جائے گا۔ اس کینٹین میں رعایتی قیمتوں پر ناشتہ، کھانا، چائے وغیرہ مہیا کرائے جائیں گے۔ انہوں نے کہاکہ بنگلور میں روزانہ پندرہ تا بیس لاکھ لوگوں کی آمد ورفت رہتی ہے، ان میں سے اکثر سیاح،مزدور اور ملازمین ہوتے ہیں، یا پھر بے روزگار افراد روزگار کی تلاش میں آتے ہیں، ان کے علاوہ شہر میں بسے غریبوں کی سہولت کیلئے بھی یہ کینٹین قائم کی جارہی ہے۔