میٹرو ریل ملازمین یونین نامنظور بی ایم آر سی ایل کے تحت کام کرنے والے ملازم نہیں: منتظمین
بنگلورو،20/ستمبر(ایس او نیوز) بنگلورو میٹرو ریل کارپوریشن لمیٹیڈ(بی ایم آر سی ایل) انتظامیہ نے ملازمین کی یونین کو نامنظور کرتے ہوئے کہا کہ ہمارے یہاں کوئی ملازم نہیں ہے بلکہ وہ سب سوپروائزر ہیں۔ اس سلسلہ میں بی ایم آر سی ایل نے مجوزہ یونین کو جاری اپنے مکتوب کے ذریعہ مطلع کردیاہے۔ ذرائع سے موصولہ اطلاع کے مطابق9ستمبر 2017کو میٹرو ریل انتظامیہ نے مذکورہ یونین کے نام ایک مکتوب جاری کیاہے جس میں اس بات کی وضاحت کی گئی ہے کہ بی ایم آر سی ایل میں کام کرنے والے لوگ ملازمین نہیں ہیں بلکہ وہ سوپروائزر ہیں۔ اس لئے وہ مزدوریونین نہیں بناسکتے ، اس میں اس بات کی بھی وضاحت کی گئی ہے کہ یہاں پر کام کرنے والوں کو10ہزار روپئے سے کم ماہانہ تنخواہ دی جاتی ہے۔ یونین کے صدر سوریہ نارائن مورتی نے اس سلسلہ میں اخباری نمائندوں کو بتایا کہ یہ معاملہ گزشتہ 2ماہ سے زیر التواء ہے۔ انہوں نے ورکرس کی جانب سے بی ایم آر سی ایل انتظامیہ کو ایک یادداشت پیش کیاتھا جس میں29؍مطالبات تھے۔ انہوں نے بتایا کہ یونین کی منظوری نہیں ملنے سے ہم ناراض نہیں ہیں اور نہ ہی ہم کوئی بڑا قدم اٹھانے والے ہیں۔ حالانکہ انتظامیہ کا یہ فیصلہ مناسب نہیں ہے۔ مسٹر مورتی نے اخباری نمائندوں کو بتایا کہ اس معاملہ کو لے کر وہ گزشتہ2 ماہ سے بی ایم آر سی ایل کے منیجنگ ڈائرکٹر پردیپ سنگھ کھرولا سے ملنا چاہتے ہیں، مگر آخری وقت میں انہیں یہ کہہ کر معذرت کرلیتے ہیں کہ وہ کسی ضروری میٹنگ میں مصروف ہیں۔