کشمیر:لال چوک پر بی جے پی یوتھ ونگ کی تاریخی ’’ترنگا ریلی‘‘ناکام بنادی گئی
سری نگر۔15اگست (یو ا ین آئی) جموں وکشمیر پولیس نے یوم آزادی کے موقع پر بھارتیہ جنتا پارٹی (بی جے پی) کی یوتھ ونگ یا’’یووا مورچا‘‘کی گرمائی دارالحکومت سری نگر کے قلب میں تاریخی لال چوک میں مجوزہ ترنگا ریلی کو ناکام بناتے ہوئے پیر اور منگل کی درمیانی رات کو لال چوک کے ہوٹلوں سے کم از کم200بی جے پی کارکنوں کو حراست میں لیا۔ ذرائع نے بتایا کہ پولیس نے بی جے پی یوتھ ونگ کے کارکنوں کو حراست میں لیکر سیول لائنز کے متعدد پولیس تھانوں میں نظربند رکھا۔ تاہم سری نگر کے بخشی اسٹیڈیم میں یوم آزادی کی تقریب کے اختتام پذیر ہونے کے بعد حراست میں لئے گئے کارکنوں کو رہا کردیا گیا۔ذرائع نے بتایا کہ بی جے پی یوتھ ونگ کارکنوں کو حراست میں لینے کا اقدام شہر میں امن وامان کی فضا کو برقرار رکھنے کے لئے اٹھایا گیا۔ ذرائع نے بتایا کہ حراست میں لئے گئے بی جے پی کارکنوں کی قیادت بی جے پی یووا مورچا کے قومی نائب صدر اعجاز حسین کررہے تھے ۔ اس دوران جموں وکشمیر کے سابق وزیر اعلیٰ عمر عبداللہ نے بی جے پی یوتھ ونگ کارکنوں کی گرفتاری کو فکسڈ میچ قرار دیا۔ انہوں نے مائیکرو بلاگنگ کی ویب سائٹ ٹویٹر پر اپنے ایک ٹویٹ میں کہا کہ فکسڈ میچ کی ایک صحیح تعریف۔ جموں وکشمیر میں بی جے پی حکومت نے قومی ترنگا لہرانے جارہے بی جے پی عہدیداران کو حراست میں لیا۔ انتظامیہ نے منگل کو تاریخی لال چوک کی طرف جانے والی تمام سڑکوں کو سیل کردیا تھا۔