بہار ٹاپرس گھوٹالے میں بچہ رائے کی ضمانت پر سماعت ملتوی
نئی دہلی:20/مارچ(ایس او نیوز ؍آئی این ایس انڈیا)سپریم کورٹ نے بہار کے مشہور ٹاپرس گھوٹالہ معاملے کے ملزم بچہ رائے کے وکیل کو ہدایت دی ہے کہ وہ دو ہفتے کے اندر تفصیلی جواب داخل کریں۔معاملے پر سماعت کے دوران بچہ رائے کے وکیل نے دلیل دی کہ انہیں ضمانت دی جائے، ملزم تقریبا 9 ماہ جیل میں گزار چکا ہے، سپریم کورٹ نے کہا کہ ملزم کی پرانی مجرمانہ تاریخ ہے۔اس لیے دو ہفتے کے اندر تفصیلی حلف نامہ داخل کریں،معاملہ کی سماعت دو ہفتے کے بعد ہوگی۔غورطلب ہے کہ 6 /مارچ کو سپریم کورٹ نے بچہ رائے کی رہائی پر فی الحال عبوری روک لگا دی تھی۔پٹنہ ہائی کورٹ نے بچہ رائے کو ضمانت دینے دی تھی، جس کے خلاف بہار حکومت نے سپریم کورٹ میں اپیل کی تھی۔بہار حکومت کی درخواست میں کہا گیا ہے کہ بچہ رائے کے جیل کے باہر رہنے سے ٹرائل متاثر ہو سکتا ہے۔ٹاپرس گھوٹالے کا ماسٹر مائنڈ بچہ رائے ہی ہے اور اس نے بہار کے تعلیمی نظام کو شک کے گھیرے میں کھڑا کر دیا ہے۔واضح رہے کہ بہار ٹاپر س گھوٹالہ سامنے آنے کے بعد ایس آئی ٹی نے بچہ رائے کے خلاف دھوکہ دہی، ٹھگی، فرضی کاغذات تیار کرنے اور جائیداد کا غلط استعمال کرنے کا معاملہ درج کیا تھا، بچہ رائے کو بہار پولیس نے یوپی کے وارانسی سے گرفتار کیا تھا۔پٹنہ ہائی کورٹ نے بچہ رائے کو 14/فروری کو مشروط ضمانت دے دی تھی، پٹنہ ہائی کورٹ نے کہا تھا کہ 30 دن کے اندر اندر چارج شیٹ دائر کی جائے اور اگر 30 دنوں میں چارج شیٹ دائر نہیں کی گئی تو ایسی صورت میں بچہ رائے کو ضمانت دے دی جائے گی۔