کمٹہ نیشنل ہائی وے پر کار پلٹ کر کھائی میں جا گری؛ پانچ زخمی؛ دو کو شدید چوٹیں
کمٹہ 8/اگست (ایس او نیوز) یہاں ناگور کراس نیشنل ہائی وے 66 پر ایک تیز رفتار کار بے قابو ہوکرپلٹتے ہوئے سڑک کے باہر کھائی میں جاگری، جس کے نتیجے میں کار پر سوار چھ میں سے پانچ لوگوں کو کافی چوٹیں آئی ہیں، جبکہ ان میں سے دو کے سر کو شدید چوٹ لگی ہیں۔
ذرائع سے ملی اطلاع کے مطابق ہوناور تعلقہ کے سڑلگی، سمسی، گیرسوپّا وغیرہ دیہاتوں کے جملہ دس لوگ جو سبھی ہوناور ایس ڈی ایم کالج کے اسٹوڈینٹس بتائے گئے ہیں، گوکرن میں سیر و تفریح کے بعد واپس اپنے اپنے گائوں جارہے تھے۔ دس میں سے چھ لوگ کار پر سوار تھے، جبکہ دیگر چار دو موٹر بائکوں پر سوار تھے۔
بتایا گیا ہے کہ ناگور کراس پر ایک کار غالباً خراب ہونے کی وجہ سے سڑک کنارے پارک کی گئی تھی اور اُس کے اطراف پتھر رکھے ہوئے تھے، طلبا کی کار تیزی کے ساتھ جب متعلقہ مقام پر پہنچی تو کار کےڈرائیور نے کھڑی کی گئی کار کے اطراف رکھے گئے پتھروں کو نوٹس نہیں کیا ، جس کے نتیجے میں ان کی کار اُن پتھروں پر چڑھ گئی اور پلک جھپکتے بے قابو ہوکر کلابازیاں کھاتے ہوئے سڑک کے باہر کھائی میں جاگری۔
ذرائع نے بتایا کہ حادثہ میں کار ڈرائیور محفوظ رہ گیا، البتہ دیگر پانچ لوگوں کو کافی چوٹیں آئی ہیں، ان میں سے دو کے سر کو شدید چوٹ لگنے کی اطلاع ملی ہے، جنہیں کمٹہ سرکاری اسپتال میں ابتدائی طبی امداد پہنچانے کے بعد فوری طور پر منی پال شفٹ کیا گیا ہے، ان دو کی شناخت دانش بڈھن ساب (20) اور انفال (20) کی حیثیت سے کی گئی ہے۔
حادثے کی اطلاع ملتے ہی کمٹہ کی الاتحادیوتھ کمیٹی کے نوجوان، صدر افتخار شیخ کی قیادت میں فوری طور پر موقع واردات پر پہنچے اور زخمیوں کو کمٹہ اسپتال پہنچایا، پھر وہاں سے تین کو ہوناوراسپتال اور دو کو منی پال اسپتال شفٹ کرانے میں بھرپور تعائون پیش کیا۔