اسمبلی اسپیکر نے شجاعت بخاری کے اہل خانہ سے تعزیت کی
سری نگر18جون(ایس او نیوز؍آئی این ایس انڈیا)جموں وکشمیرقانون ساز اسمبلی کے اسپیکرڈاکٹر نرمل سنگھ نے پیر کے روز شمالی کشمیر کے ضلع بارہمولہ کے کریری گاؤں جا کر مقتول صحافی ڈاکٹرسیدشجاعت بخاری کے سوگوار خاندان کے ساتھ تعزیت کا اظہار کیا۔غمزدہ خاندان سے اظہارِ ہمدردی کرتے ہوئے ڈاکٹر نرمل سنگھ نے کہا کہ شجاعت بخاری کے قتل سے ریاست بھر میں ایک غم و غصے کی لہر دوڑ گئی اور اس واقعے کی مقامی،قومی اور بین الاقوامی سطحوں پر مذمت کی گئی۔انہوں نے کہا کہ ریاست میں میڈیا کی کارکردگی میں بہتری لانے اور نئی نسل میں صحافت سے متعلق اعلیٰ اخلاق و نظم و ضبط قایم رکھنے میں جو کردار شجاعت بخاری نے ادا کیا اْسے کبھی بھی فراموش نہیں کیا جا سکتا۔