نئی دہلی، 15 مارچ(ایس او نیوز؍آئی این ایس انڈیا) سماج وادی پارٹی (ایس پی) نے لوک سبھا انتخابات کے لئے گونڈا، بارہ بنکی (محفوظ)، کیرانہ اور سنبھل لوک سبھا سیٹ کے لئے اپنے امیدواروں کا اعلان کر دیا ہے۔پارٹی نے جمعہ کو گونڈہ لوک سبھا سیٹ سے ونود کمار سنگھ عرف پنڈت سنگھ، بارہ بنکی سے رام سمندر راوت، کیرانہ سے تبسم حسن اور سنبھل سے شفیق الرحمن برق کے ناموں کا اعلان کیا۔سنبھل اور کیرانہ سیٹ ایس پی کے لئے مضبوط مانی جا رہی ہے،کچھ دن پہلے ہی لوک سبھا سیٹ کے لئے ہوئے ضمنی انتخابات میں کیرانہ سے تبسم حسن جیت کر پارلیمنٹ پہنچی ہیں۔گونڈہ سے پنڈت سنگھ بھی مضبوط امیدوار بتائے جا رہے ہیں۔اس سے پہلے ایس پی نے ہاتھرس اور مرزا پور سے اپنے امیدواروں کا اعلان کیا تھا۔مدھیہ پردیش کے ٹیکم گڑھ سیٹ سے رترام بنسل الیکشن لڑیں گے،پارٹی نے اپنے ٹوئٹر اکاؤنٹ پر ان ناموں کا اعلان کیا ہے۔رام جی لال سمن کو ہاتھرس اور راجندر ایس وند کو مرزا لوک سبھا حلقہ سے امیدوار بنایا گیا ہے۔ایس پی اب تک اپنے 15 امیدوار اعلان کر چکی ہے۔ایس پی نے سب سے پہلے تین امیدواروں کی فہرست جاری کی تھی جس میں پارٹی صدر اکھلیش یادو کی بیوی ڈمپل یادو کا بھی نام تھا۔اس کے بعد 6 امیدواروں کی فہرست جاری کی تھی جس میں پارٹی سرپرست ملائم سنگھ یادو کا نام بھی شامل تھا۔غور طلب ہے کہ لوک سبھا انتخابات میں اتحاد کے تحت ایس پی 37 اور بی ایس پی 38 سیٹوں پر انتخاب لڑنے جا رہی ہیں۔اس اتحاد میں قومی لوک دل (آر ایل ڈی) کو بھی شامل کیا گیا ہے اور اسے تین نشستیں دی گئی ہیں،اتحاد نے رائے بریلی اور امیٹھی میں اپنے امیدوار نہیں اتارنے کا اعلان کیا ہے۔رائے بریلی سونیا گاندھی کا اور امیٹھی راہل گاندھی کا حلقہ ہے۔ایس پی بی ایس پی نے انتخابی مہم کو لے کر مشترکہ پروگرام تیار کیا ہے۔مغربی یوپی مشترکہ ریلیوں کا آغاز نوراتری میں ہوگا۔پہلی مشترکہ ریلی 7 اپریل کو دیوبند میں ہوگی جسے مایاوتی، ایس پی کے قومی صدر اکھلیش یادو اور راشٹریہ لوک دل کے صدر اجیت سنگھ خطاب کریں گے۔اس طرح کی ریلیاں پوری ریاست میں ہوں گی جس اتحاد کے رہنما مشترکہ طور پراسٹیج شیئر کریں گے۔