نئی دہلی، 23؍اپریل(ایس او نیوز؍آئی این ایس انڈیا )لاؤڈ اسپیکر سے اذان دینے کو غنڈہ گردی کہنے والے بالی وڈ گلوکار سونو نگم نے اتوار کی صبح ایک ویڈیو ٹوئٹ کیا، جس سے پھر تنازعہ کھڑا ہو سکتا ہے۔دراصل اس بار سونو نگم نے اذان کا ایک ویڈیو ٹوئٹ کیا ہے، جس میں صبح کے وقت اذان کی آواز سنائی دے رہی ہے، دو منٹ بیس سیکنڈ کے اس ویڈیوکو ٹوئٹ کرتے ہوئے گلوکار نے لکھا، ’گڈمارنگ انڈیا‘۔غور طلب ہے کہ سونو نگم کچھ دنوں پہلے لاؤڈ اسپیکر سے مساجد میں ہونے والی اذان کی وجہ سے صبح کی نیند ٹوٹنے سے ناراض ہو گئے تھے۔انہوں نے اس کو لے کر ٹوئٹر پر اپنی بھڑاس نکالتے ہوئے لکھا تھاکہ میں مسلمان نہیں ہوں ،لیکن روز صبح مجھے اذان کی آواز سے اٹھنا پڑتا ہے۔انہوں نے آگے لکھا تھا، آخر کب ہندوستان سے یہ زبردستی مذہبی جذبات تھوپنے کی روایت ختم ہوگی ؟ ویسے جب پیغمبر محمد(صلی اللہ علیہ وسلم ) نے اسلام بنایا تھا تب بجلی نہیں تھی۔سونو نگم نے یہ بھی کہاکہ مجھے نہیں لگتا کہ کوئی مندر یا گرودوارہ بجلی کا استعمال ان لوگوں کو جگانے کے لیے کرتے ہیں جو اس مذہب کی پیروی نہیں کرتے، تو پھر ایسا کیوں؟ غنڈہ گردی ہے بس۔سونو نگم کے اس ٹوئٹ کے بعد معاملہ نے طول پکڑ لیاتھا اور بالی وڈ سے لے کرسیاسی رہنماؤں نے اس معاملے پر اپنی رائے پیش کی تھی ، کچھ لوگوں نے تو سونو نگم کے بیان سے اتفاق بھی کیاتھا ،لیکن زیادہ تر لوگوں نے گلوکار کے اس بیان کی مذمت بھی کی۔معاملے کو طول پکڑتا دیکھ کر سونو نگم نے اپنے بیان پر صفائی بھی دینے کی کوشش کی تھی ۔سونو نے صفائی دیتے ہوئے کہا کہ انہوں نے اذان پر نہیں بلکہ لاؤڈ اسپیکر پر سوال اٹھایا تھا، ساتھ ہی اس گلوکار نے یہ بھی صاف کر دیا ہے کہ ایسا بیان انہوں نے صرف مساجد میں ہونے والے لاؤڈ اسپیکر کے استعمال کی وجہ سے نہیں بلکہ مندروں اور گرودوارے کے لیے بھی دیا ہے۔سونو نگم نے کہا ہے کہ وہ سبھی مذاہب کا احترام کرتے ہیں۔