ہونیارا،10/دسمبر(ایس او نیوز /آئی این ایس انڈیا)بحرالکاہل میں واقع جزائر سلیمان ”سولومون آئی لینڈز“میں علی الصبح 6,9شدت کے طاقت ور زلزلے کے جھٹکے محسوس کیے گئے لیکن اس میں کسی قسم کے جانی نقصان کی اطلاع موصول نہیں ہوئی ہے۔گزشتہ 24گھنٹوں کے دوران اس ملک میں آنے والا یہ دوسرا بڑا زلزلہ تھا۔ جمعہ کو 7,7شدت کے زلزلے سے یہ خطہ لرز اٹھا تھا۔بحرالکاہل میں سونامی کی وارننگ جاری کرنے والے مرکز کے مطابق فی الوقت سونامی کا خطرہ نہیں لیکن اس نے متنبہ کیا ہے کہ جزائر سلیمان اور پاپوا نیو گنی کے ساحلوں پر تین میٹر تک بلند لہریں اٹھ سکتی ہیں۔ان زلزلوں میں نہ تو جانی نقصان ہوا اور نہ ہی بڑے پیمانے پر املاک کی کسی قسم کی تباہی کی اطلاعات موصول ہوئی ہیں۔امریکی ارضیاتی سروے کے مطابق زلزلے کا مرکز جزائر کے علاقے کیرا کیرا کے مغرب میں 90کلومیٹر دور اور زیر زمین 10کلومیٹر گہرائی میں تھی۔جزائر سلیمان بھی رنگ آف فائر ”حلقہ آتش“کہلانے والے خطے میں واقع ہے جہاں زیر زمین تبدیلیوں اور آتش فشاں وں کی وجہ سے زلزلے آتے رہتے ہیں۔رواں ہفتے اسی خطے میں واقع انڈونیشیا میں بھی آنے والے 6,5شدت کے زلزلے میں ایک سو سے زائد افراد ہلاک اور سیکڑوں زخمی ہوگئے تھے جب کہ بڑے پیمانے پر املاک کو نقصان پہنچا تھا۔