رام اللہ میں سرچ آپریشن کے دوران زخمی اسرائیلی فوجی ہلاک
رام اللہ27مئی (ایس او نیوز؍آئی این ایس انڈیا ) اسرائیل کے طبی ذرائع کی طرف سے جاری کردہ ایک بیان میں بتایا گیا ہے کہ تین روز قبل رام اللہ میں ایک سرچ آپریشن کے دوران اینٹ لگنے سے زخمی ہونے والا فوجی اہلکار اسپتال میں زخموں کی تاب نہ لاتے ہوئے ہلاک ہوگیا۔اسرائیلی اخبار ’اسرائیل ٹوڈے‘ کے مطابق اسپتال میں ہلاک ہونیو الا اسرائیلی فوجی جمعرات کے روز رام اللہ میں ایک مطلوب فلسطینی کی تلاش زخمی ہوگیا تھا۔فوجی اہلکار کا تعلق فوج کی ’ڈوڈڈفن‘ یونٹ کے ساتھ بتایا جاتا ہے۔ اسے رام اللہ میں الامعری پناہ گزین کیمپ میں ایک فلسطینی شہری کے گھر پرچھاپے کے دوران سرپر اینٹ لگنے کے بعد اسپتال منتقل کیا گیا تھا۔اینٹ لگنے سے اسرائیلی فوجی کی کھوپڑی ٹوٹ گئی تھی اور اسے بے ہوشی کی حالت میں اسپتال منتقل کیا گیا جہاں وہ زخمیوں کی تاب نہ لاتے ہوئے ہلاک ہوگیا۔
