پٹنہ25اپریل(ایس او نیوز؍آئی این ایس انڈیا) بہار کے وزیر اعلیٰ نتیش کمار سوشل میڈیا سے خفا ہیں، انہیں سوشل میڈیا نہیں راس آتا ہے ۔ سوشل میڈیا کے تئیں ان کی کیا رائے ہے اس سلسلے میں ا نہوں ا زخود اس کا خلاصہ کیا ہے ۔ ویر کنور سنگھ کی سال گرہ (جینتی )سے متعلق ایک سرکاری پروگرام میں نتیش نے صاف صاف کہا کہ آج کل سوشل میڈیا کی بہت اہمیت ہو گئی ہے ، اس پر لوگ کچھ نہ کچھ لکھتے رہتے ہیں۔ نتیش کے مطابق اس کا سچ سے کوئی مطلب نہیں ہے ۔ ان کے مطابق لوگ کئی جھوٹی باتیں لکھ دیتے ہیں۔ سوشل میڈیا پر کسی ویڈیو یا مضمون کے وائرل ہونے کے بارے میں نتیش نے چٹکی لیتے ہوئے کہا کہ پہلے بخار وائرل ہوتا تھا، اب یہ سب چیزیں بھی اسی زمرہ میں آ گئی ہیں۔ نتیش نے اگرچہ سب کو ہوشیار کرتے ہوئے کہا کہ ایسا نہ ہو کہ آنے والی نسل ٹکنالوجی میں اس قدر کھو جائے کہ اپنے آپ کوہی فراموش کربیٹھے۔ نتیش کمار نے سوشل میڈیا پر اپنے عدم اعتماد کی وجہ بھی شمار کرائے۔ ان کے مطابق سوشل میڈیا میں کچھ بھی گندی چیزوں لوگ ڈال دیتے ہیں جس کی وجہ سے ہنگامہ شروع ہو جاتا ہے اور پھر حکومت کو اس کو کنٹرول کرنے کے لئے محنت کرنی پڑتی ہے۔ نتیش کا خیال ہے کہ سوشل میڈیا کا استعمال ا گر مثبت کیاجائے تو لوگوں کو زیادہ مدد ملے گی ۔انہوں نے یہ بھی کہا کہ ابھی تو سارا وقت محتاط رہ کر سارے جھگڑے نمٹانے میں ہی صرف ہوجاتا ہے ۔