نئی دہلی12ستمبر (ایس او نیوز؍ آئی این ایس انڈیا ) بی جے پی نے منگل کو کہا کہ کانگریس صدر راہل گاندھی اور ان کی ماں سونیا گاندھی کے سال 2011۔2012 کے ٹیکس کیس کودوبارہ کھولے جانے کے انکم ٹیکس (IT) محکمہ کے فیصلے کے خلاف ان کی درخواستوں سے پتہ چلتا ہے کہ کانگریس میں گہرائی تک بدعنوانی جڑ جمائے ہوئی ہے۔
مرکزی وزیراسمرتی ایرانی نے کہا کہ راہل گاندھی کو بہت سے سوالات کے جواب دینے کی ضرورت ہے۔ ایک دن پہلے ہی دہلی ہائی کورٹ نے ’’نیشنل ہیرالڈ‘‘ اخبار سے متعلق ایک معاملے میں راہل۔سونیا کے ٹیکس کیس کودوبارہ کھولے جانے کوچیلنج کرنے والی ان کی درخواستوں کو مسترد کر دیا تھا۔
ایرانی نے یہاں نامہ نگاروں سے کہاہے کہ راہل گاندھی اور سونیا گاندھی کی اپیل پر کل کے عدالت کے فیصلے سے یہ پتہ چلتا ہے کہ کانگریس پارٹی کے اندر کافی گہرے تک بدعنوانی جڑ جمائے ہوئی ہے۔
آسکرفرنانڈیز سمیت کانگریس کے سب سے سنیئر رہنماؤں کی درخواستوں کے مسترد ہونے سے اب سال 2011۔12ٹیکس ادائیگی کے لیے ان کے ریکارڈ کی دوبارہ تحقیقات کے تناظر میں محکمہ انکم ٹیکس کے لیے راستہ تیارہواہے۔