ریاست میں اسمارٹ سٹی منصوبے پر کام میں تیزی جلد، رسل مارکیٹ اور کے آر مارکیٹ کی تجدید منصوبے میں شامل: یو ٹی قادر
بنگلورو،18؍جولائی(ایس او نیوز) ریاستی وزیر برائے شہری ترقیات یوٹی قادر نے کہا ہے کہ مرکزی وریاستی حکومتوں کے اشتراک سے اسمارٹ سٹی منصوبے کو تیزی سے آگے بڑھانے کے مقصد سے آج محکمے کے اعلیٰ افسروں کے ساتھ ایک میٹنگ کی گئی۔
میٹنگ کے بعد اخبار ی نمائندوں سے بات چیت کرتے ہوئے انہوں نے بتایاکہ مرکزی حکومت نے اسمارٹ سٹی منصوبے کے تحت ریاست کے سات شہروں کا انتخاب کیا ہے جن میں راجدھانی بنگلور بھی شامل ہے۔
انہوں نے کہاکہ 50 فیصد اشتراک کی بنیاد پر اسمارٹ سٹی کے منصوبے کو مرکزی اور ریاستی حکومت مکمل کریں گی۔اس منصوبے پر14798کروڑ روپیوں کا خرچ آئے گا۔ انہوں نے کہاکہ منصوبے کو عملی جامہ پہنانے کے لئے ہر اسمارٹ سٹی کے لئے ایک الگ منیجنگ ڈائرکٹر کا تقرر کیا جائے گا جو ضلع کے ڈپٹی کمشنر کے ساتھ مل کر ترقیاتی منصوبوں کو آگے بڑھائیں گے۔
انہوں نے کہاکہ اسمارٹ سٹی منصوبے کو آگے بڑھانے کے لئے مقامی کارپوریٹر اور وہاں کے چھ افسروں پر مشتمل ایک کمیٹی تشکیل دی جائے گی اور متعلقہ وارڈ میں تمام ترقیاتی کاموں کے لئے یہ کمیٹی راست طور پر ذمہ دار ہوگی۔ انہوں نے کہاکہ ہر ماہ یہ کمیٹی کاموں کی پیش رفت کا جائزہ لے گی اور تمام کمیٹیوں کی رپورٹیں محکمے کے سکریٹری کو روانہ کی جائیں گی۔
انہوں نے کہاکہ اسمارٹ سٹی منصوبے کی پیش رفت کا جائزہ لینے کا موقع عوام کو بھی مہیا کرایا جائے گا اور ویب سائٹ پر تمام تفصیلات اپ لوڈ کی جائیں گی تاکہ ہمہ وقت منصوبے کی پیش رفت سے عوام کو آگاہی ملتی رہے۔ انہوں نے کہاکہ بنگلور میں اسمارٹ سٹی کے تحت کاموں کی شروعات ہوچکی ہے، 190 کروڑ روپیوں کی لاگت پر 17 سڑکوں کو سدھارا جارہا ہے۔
انہوں نے کہاکہ شہر کے شیواجی نگر میں واقع رسل مارکیٹ اور کے آر مارکیٹ کی ترقی کا جامع منصوبہ تیار کیاگیا ہے۔ اس موقع پر کرناٹکا اربن انفرااسٹرکچر ڈیولپمنٹ کارپوریشن کے منیجنگ ڈائرکٹر اور دیگر اعلیٰ عہدیدار موجود تھے۔
