سیتارام یچوری کے ہاتھ میں پھر سے سی پی ایم کی کمان ، دوبارہ جنرل سکریٹری منتخب
حیدرآباد،22؍اپریل (ایس او نیوز؍ آئی این ایس انڈیا )حیدرآباد میں منعقدہ پارٹی کی 22ویں کانگریس میں سیتارا م یچوری کو سی پی ایم کے جنرل سکریٹری کے طورپر دوسری معیاد کے لئے منتخب کرلیا گیا۔ پارٹی کی نئی سنٹرل کمیٹی نے بہ اتفاق رائے ان کا اس اعلی عہدہ کیلئے دوسری معیاد کے لئے انتخاب کیا ۔ پارٹی کی پولیٹ بیورو کا اجلاس اتوار کو منعقد ہوا تاکہ نئی سنٹرل کمیٹی تشکیل دی جاسکے۔نئی سنٹرل کمیٹی نے اپنے نئے جنرل سکریٹری کو منتخب کرلیا ۔بتایاجاتا ہے کہ یچوری اورکرت کے درمیان پارٹی کے سیاسی موقف پر مبینہ طورپر اختلافات پارٹی کی کانگریس میں دیکھے گئے۔سی پی ایم نے 95رکنی سنٹرل کمیٹی تشکیل دی ۔بتایاجاتا ہے کہ اس ہفتہ کے اوائل میں شہر حیدرآباد میں شروع ہوئی اس کانگریس کے دوران کرت کیمپ تریپورہ کے سابق وزیراعلی مانک سرکار کو یچوری کے خلاف امیدوار بنانا چاہتا تھا ۔یچوری نے آندھراپردیش کے وشاکھاپٹنم میں 2015میں منعقدہ پارٹی کی 21ویں کانگریس میں کرت سے یہ عہدہ حاصل کیا تھا۔جمعہ کو پارٹی نے پہلی مرتبہ اپنی سیاسی قرارداد میں ترمیم کرتے ہوئے کانگریس کے ساتھ مفاہمت کا اشارہ دیا تھا۔
