سرسی 31؍مارچ (ایس او نیوز) ملک کے بگڑتے ہوئے سماجی اور سیاسی پس منظر میں ملت کے مختلف مکاتب فکر سے وابستہ ذمہ داران کو ایک پلیٹ فارم پر لانے کی کوشش جماعت اسلامی ہند کی طرف سے کی جارہی ہے ، اسی  ضمن میں ضلعی سطحوں پر ’رابطۂ ملّت‘ کمیٹیوں کی تشکیل بھی عمل میں لائی جارہی ہے۔

ذرائع سے ملی اطلاع کے مطابق ضلع شمالی کینرا میں اسی کوشش کے تحت سرسی کے منیار ہال میں ایک اہم مشاورتی اجلاس جماعت اسلامی ہند کرناٹکا کے جنرل سکریٹری محمد یوسف کنہی کی صدارت میں منعقد ہوا۔ ذرائع نے بتایا کہ اس اجلاس میں  ضلع کے مختلف مقامات سے جماعت اسلامی کے علاوہ تبلیغی جماعت، اہل سنت والجماعت، اہل حدیث وغیرہ مکاتب و مسالک اور جماعتوں کے ذمہ داران شریک ہوئے۔باہمی غور وخوض کے بعد ایک ضلع کمیٹی تشکیل دی گئی جس میں ہلیال کے ایڈوکیٹ عظیم الدین مجاور صدر اور بھٹکل کے جناب طلحہٰ سدی باپا کو جنرل سکریٹری منتخب کیا گیا۔جبکہ نائب صدور کے طور پر مولانا عبدالرشید، عبدالبشیر(سرسی)، محمد اشفاق(ہوناور)، محمد رضوان (ہلیال)، محمد منصور (کاروار)اور محی الدین صاب(ولکی) کا انتخاب ہوا۔اس کے علاوہ سکریٹری کے طور پرمحمد مظفر(کمٹہ)، عبدالقادر (منڈگوڈ)محمد یوسف موگد(یلاپور) محمد نذیر (سداپور) اور محمد رضا مانوی (بھٹکل) منتخب ہوئے۔

صدارتی خطاب کرتے ہوئے جناب محمد یوسف کنہی نے بتایا کہ ریاست بھر میں مسلمانوں کو متحدہ پلیٹ فارم پرلانے کی کوشش کی جارہی ہے اور اب تک ریاست کے 25 اضلاع میں رابطۂ ملت کمیٹیوں کی تشکیل عمل میں آچکی ہے، جس میں ضلع شمالی کینرا کی کمیٹی کا تازہ اضافہ ہوا ہے۔ان کمیٹیوں کا مقصد جہاں مسلمانوں کا اتحاد اور ان کے مفادات کا تحفظ ہے وہیں پر برادران وطن کے ساتھ بہتر روابط، بھائی چارگی اور امن و امان کی فضا کوفروغ دیتے ہوئے دیش کی ترقی کے لئے سرگرم رہنا ہے۔اس متحدہ پلیٹ فارم میں کسی قسم کے سیاسی موضوع اور مقصد کا کوئی دخل نہیں ہے۔