کاروار 3؍فروری (ایس او نیوز) سرسی کے بنواسی میں’ کدمبا اتسوا‘کا افتتاح کرتے ہوئے ضلع انچارج وزیر آر وی دیشپانڈے نے کہا کہ انسان کی ترقی میں تہذیب وثقافت اور فنکاری کا بڑا حصہ ہوتا ہے۔اور سرکار کی طرف سے کراولی اتسوا سمیت اس طرح کے دیگر اتسوا کا اہتمام کرکے تہذیب و ثقافت اور فنکاری کو فروغ دینے کا موقع فراہم کیا جاتا ہے۔

وزیر موصوف نے مزید کہا کہ ہر انسان کو انسانیت کے جذبات کے ساتھ زندگی گزارنی چاہیے۔ اس طرح کے تہواروں سے انسانی اور تہذیبی اقدار کو تقویت ملتی ہے۔اس کے ساتھ ہی ضلع کی ترقیاتی کام بھی انجام دئے جاتے ہیں۔اس موقع پربنواسی سرکل کا نام ’پمپ سرکل‘ کرنے کا اعلان کرتے ہوئے انہوں نے کہاکہ ضلع کا ’پمپ ایوارڈ‘ پروفیسرنثار احمدکو دیا جانا دراصل اس ایوارڈ کے لئے قابل رشک ہے۔

پروفیسر نثار احمد نے ایوارڈ قبول کرتے ہوئے کہا کہ اس قابل فخر ایوارڈ کو حاصل کرتے ہوئے انہیں خوشی ہورہی ہے۔ حالانکہ یہ ایوارڈ مجھے 11برس پہلے ملنا چاہیے تھا وہ آج مل رہا ہے، پھر بھی میں اس کے لئے ریاستی حکومت ، وزیراعلیٰ اور ایوارڈ کمیٹی کا مشکور ہوں کہ انہوں نے اس ایوارڈ کے لئے مجھے منتخب کیا۔

ایم ایل اے شیورام ہیبار نے استقبالیہ خطاب کیا۔مہمان خصوصی کے طور پر ایم ایل اے وشویشورا ہیگڈے کاگیری، ضلع پنچایت صدر جئے شری موگیر، ضلع ڈپٹی کمشنر ایس ایس نکول، ضلع پنچایت سی ای او چندرا شیکھر نائک،ضلع ایس پی ونائیک پاٹل،محکمہ کنڑا وثقافت کے ڈائریکٹر این آر وشو کماروغیرہ موجود تھے۔