سرسی:بیٹی سے ملاقات کے لئے شہر سے باہر جانا مہنگا پڑا۔ چوروں نے گھر میں گھس کر مچائی لاکھوں کی لوٹ
سرسی 9؍جولائی (ایس او نیوز)سرسی نہرو نگر کے رہنے والے عبدالشکور اور ان کے اہل خانہ کو اپنی بیٹی سے ملاقات کے لئے تیرتھ ہلّی میں واقع اس کے گھر جانا بڑا مہنگا ثابت ہوا کیونکہ ان کی غیر حاضری کا فائدہ اٹھاتے ہوئے چوروں نے گھر میں گھس کر چوری کی واردات انجام دی ہے جس سے انہیں لاکھوں روپوں کا نقصان ہوا ہے۔
کہتے ہیں کہ شہر سے باہر جاتے وقت انہوں نے ایک عمر رسیدہ شخص کو گھر میں موجود جانوروں کو چارہ ڈالنے کی ذمہ داری دی تھی۔ وہ شخص روزانہ ایک خاص وقت پر آکر یہ کام انجام دیتا تھا۔ لیکن اتوار کے دن جب وہ گھر پر پہنچا تو دروازے کا تالا ٹوٹا ہو اتھا۔اس نے آس پاس کے لوگوں کو اس کی خبر کردی۔اس کے بعد پڑوسیوں نے پولیس اور عبدالشکور کوگھر میں چوری ہونے کی اطلاع دی۔گھر والوں نے واپس لوٹ کر معائنہ کیاتو پتہ چلا کہ الماری میں موجود تقریباً65 ہزار روپے اور 2تولہ وزنی سونے کے زیورات اور آدھا کیلو وزنی چاندی کے سامان پر چوروں نے ہاتھ صاف کردیا ہے۔
پولیس نے موقع پر پہنچ کر معائنہ کیا ۔ مزید تحقیقات کے لئے کاروار سے فنگر پرنٹ ماہرین کو طلب کرلیا۔اے ایس پی ناگیش نے جائے واردات پر پہنچ کر جائزہ لینے کے بعد سرکل انسپکٹر گریش کی نگرانی میں تفتیش کے لئے ضروری رہنمائی کی۔ مارکیٹ پولیس اسٹیشن کے سب انسپکٹر ششی کمار نے کیس درج کرلیا ہے۔