سرسی میں چار پہیہ والی سواریوں کو وھیل لاک : ٹرافک نظام کی درستی پر کمربستہ پولس
سرسی:11؍مارچ (ایس او نیوز) دن بدن ترقی کی طرف گامزن شہر سرسی میں ٹرافک نظام ایک بڑا مسئلہ بنتا جارہاہے، جہاں دیکھووہاں سواریوں کو پارک کرکے مالکان چلے جاتے ہیں جس سے ٹرافک متاثر ہورہی تھی، اسے دیکھ کر سرسی پولس نے چار پہیہ والی سواریوں کو وھیل لاک لگانا شروع کردیا ہے۔
ذرائع سے ملی اطلاع کے مطابق محکمہ پولس کی جانب سے پیر سے چار پہیہ والی سواریوں کو وھیل لاک لگانا شروع کردیا گیا ہے، اب سواری مالکان کو جہاں جگہ ملے، وہاں سواری پارک کرکے چلے جانا آسان نہیں ہوگا۔ کیونکہ ایسی صورت میں پولس خاموشی کے ساتھ ان کی سواری کووھیل لاک لگا کر نکل جاتی ہے۔ عین وقت پر اپنی سوار ی کو لےکر نکلنا دشوار ہوگا۔ اس کے لئے ضروری ہوگا کہ پہلے آپ پتہ کریں کہ کس پولس تھانے کی پولس نے وھیل لاک لگایا ہے۔ پتہ چلنے کے بعد متعلقہ پولس تھانے جاکر جرمانہ عائد کرنےکے بعد تمہاری سواری چلنے کے لائق بنے گی۔ پیر سے جاری ہوئی یہ کارروائی سواریوں کے لئے چوکنا کرتی ہے کہ سواری کھڑی کرنے سے پہلے سومرتبہ سوچ لیں ورنہ سواری وہیں رہے گی پھر آپ مارے مارے پولس تھانے کے چکر لگاتے رہیں گے، اور جب تک تھانہ پہنچ کر جرمانہ ادا نہیں کریں گے، آپ کی سواری نہیں چلے گی۔ پولس کی متعلقہ کارروائی کی عوام ستائش کررہے ہیں۔