سرسی اور اطراف میں سرگرم ہے لاولد جوڑوں کو اولاد ہونے کی دوائی کے نام پر دھوکہ دینے والا گروہ ۔ عوام رہیں ہوشیار!
سرسی 25؍مارچ (ایس او نیوز) پچھلے تین چار مہینوں سے سرسی ، سداپور اور اس کے اطراف میں ایک گروہ سرگرم ہے جو لاولد جوڑوں کو اولاد ہونے کا یقین دلاکر دوائیاں فروخت کررہا ہے اوربھاری رقم وصول کررہا ہے ، جب کہ دوائیوں کاکوئی مثبت اثر نہیں ہوتا۔
معلوم ہوا ہے کہ ان دھوکے باز دوافروشوں کے جال میں دیہاتی علاقے کے عوام پھنس رہے ہیں۔ دھوکہ دہی کا تازہ واقعہ سرسی کے ہیپانلّی میں ایک جوڑے کے ساتھ پیش آیا ہے جس میں حمل ٹھہرنے اور بچہ پیدا ہونے کا یقین دلاکر کچھ دوائیاں دیتے ہوئے ایک شخص نے تقریباً 30ہزار روپے وصول کرلیے اور پھر لاپتہ ہوگیا۔
ذرائع سے ملی اطلاع کے مطابق لاولد جوڑے کو دھوکہ دینے کے لئے کوئی بڑا گروہ کام کررہا ہے۔ یہ لوگ کہیں پر آشا کارکن اور کہیں پر بنگلورو اسپتال کے نمائندے بن کر ان لوگوں سے ملاقات کرتے ہیں جن کے یہاں شادی کے بعد بچے نہیں ہوتے۔ وہ یہ بھی بتاتے ہیں کہ سرکاری سروے میں ان کانام لاولد جوڑوں میں درج ہوا ہے اس لئے ایسے افراد کی مدد کے لئے انہیں بھیجا گیا ہے۔ جب لوگ ان کی چکنی چپڑی باتوں میں آجاتے ہیں تو یہ لوگ دو گولیاں دیتے ہیں اور ایک ہفتے بعد مزید دوائیاں فراہم کرنے کا وعدہ کرکے رقم وصول کرلیتے ہیں۔ یہ لوگ اپنا موبائل نمبر بھی دے جاتے ہیں، جو کہ بعد میں نقلی ثابت ہوتا ہے۔
سرسی پولیس اسٹیشن میں اس طرح کا معاملہ درج کیے جانے کے بعد پولیس نے عوام کو آگاہ کیا ہے کہ اگر کہیں بھی اس قسم کی باتیں کرنے اور دوائیاں فراہم کرنے والا کوئی شخص نظر آتا ہے تو فوری طور پر قریبی پولیس اسٹیشن سے رابطہ کریں اور ان جعلسازوں کی باتوں میں ہرگز نہ آئیں۔
