سرسی میں ایس ڈی پی آئی کا زبردست احتجاجی مظاہرہ۔بابری مسجد کی تعمیر نو مطالبہ
سرسی 8؍ستمبر (ایس اونیوز)بابری مسجدکی شہادت کی 26ویں برسی کے موقع پر سوشیل ڈیموکریٹک پارٹی آف انڈیا کی جانب سے سرسی میں پوسٹ سرکل کے پاس زبردست احتجاجی مظاہرہ کرتے ہوئے بابری مسجد کی تعمیر نو کا مطالبہ کیا گیا۔
اس احتجاجی مظاہر ے میں ایس ڈی پی آئی کے ریاستی جنرل سکریٹری اشرف مچار، ضلعی صدر توفیق بیاری، پی ایف آئی کے ضلع سکریٹری مولانا معظم، پی ایف آئی سرسی ڈیویژن کے صدر محسن ہوناور، ڈیویژن سکریٹری عبدالغفار، ضلع جنرل سکریٹری عارف رضاکے علاوہ ایس ڈی پی آئی اور پی ایف آئی کی ضلعی کاونسل کے اراکین اور کارکنان نے بڑی تعداد میں شرکت کی ۔
پوسٹ سرکل پر جمع ہونے والے مظاہرین نے مسجد کے انہدام اور فرقہ وارانہ تشدد بھڑکانے میں ملوثت ہندونواز تنظیموں کے خلاف مذمتی نعرے بازی کی۔مظاہرین سے خطاب کرتے ہوئے مولانا معظم نے آر ایس ایس پر الزام لگایا کہ وہ ایودھیا میں رام مندر کی تعمیر کا مطالبہ کرتے ہوئے ملک میں بدامنی پھیلانے اور جمہوری اقدار کو تباہ کرنے میں مصروف ہے۔
اس موقع پر احتجاجی مظاہرین نے مسجد کی تعمیر نو کا مطالبہ کرنے کے علاوہ 15ویں صدی عیسوی میں تعمیر شدہ مسجد کو ڈھانے کے لئے ذمہ دار تمام افراد کے خلاف جاری مقدمات کو جلد ازجلد انجام تک لے جانے اور قصورواروں کے خلاف سخت کارروائی کرنے کی مانگ کی۔حکومت سے یہ مطالبہ بھی کیا گیا کہ ایسا کوئی بھی قانون پاس کرنے سے گریز کیا جائے جو عدل و انصاف کے اصولوں کے منافی ہو۔ مظاہرین نے اس موقع پر تمام جمہوری اور سیکیولر نظریات رکھنے والوں کا شکریہ بھی اداکیا جنہوں نے مسجد کی تعمیر نو کے حق میں آواز بلند کی ہے۔