سرسی 28؍جولائی (ایس او نیوز) 25جولائی کو سرسی کے ویویکا نگر کے قریب کے ایس آر ٹی سی بس کی ٹکر لگنے سے کرشنا مورتی تڈس کی موت واقع ہوگئی تھی اور اس کی 9ویں جماعت میں زیر تعلیم چھوٹی لڑکی شدید زخمی ہوگئی تھی۔ علاج کے لئے اس زخمی لڑکی کو ہبلی کے کیمس اسپتال میں داخل کیا گیا ہے۔

کرشنا تڈس کی چار اولادیں ہیں جو سب کی سب بیٹیاں ہیں۔ کرشنا محنت مزدوری کرکے کسی طرح گھر کا خرچ چلایا کرتاتھا اور ساتھ ہی ساتھ اپنی بیٹیوں کو تعلیم یافتہ بنانے کی دھن اس کے سر پر سوار تھی۔ اس کی ایک بیٹی اس وقت ٹیچرس ٹریننگ (ڈی ایڈ) کے دوسرے سال میں زیر تعلیم ہے۔ کرشنا نے اپنی بچیوں کی پڑھائی کے لئے بینکوں اور سوسائٹیوں سے قرضے بھی لے رکھے تھے۔ اچانک حادثے میں کرشنا کی موت سے سرسی کا یہ غریب اور مفلس خاندان بالکل بے سہارا ہوگیا ہے۔ کمانے والا باپ نہیں رہا۔کھانے پینے کا کوئی انتظام کرنے والا نہیں ہے۔ رہنے کے لئے گھر نہیں ہے۔اورسب سے اہم مسئلہ ہبلی کے اسپتال میں زندگی اور موت کی جنگ لڑتی ہوئی دیپا کرشنا مورتی کے علاج کا خرچ برداشت کرنے کا کوئی سہارا نہیں ہے۔ دیپاکی ماں اننا پورنا اور بہنوں نے اہل خیر حضرات سے اس کی زندگی بچانے اور علاج کے لئے دل کھول کر امداد کرنے اپیل کی ہے۔

اس مجبور اور بے سہارا خاندان کی امداد کرنے کے خواہشمندمخیر حضرات اپنا عطیہ
کارپوریشن بینک سرسی IFSC code: CORP 0000116 میں اننا پورنا تڈس کے اکاؤنٹ نمبر520101231437176میں جمع کرسکتے ہیں۔